નવી દિલ્હી,તા.૨૫

ભારત-પાકિસ્તાન સરહદ પર ફરી એકવાર સૈન્યના જવાનોને હાઇ એલર્ટ પર રાખવામાં આવ્યા છે. ગુપ્તચર એજન્સીને માહિતી મળી છે કે, પાકિસ્તાની સેના ખૈબર પખ્તુનખ્વામાં ચાલી રહેલા બળવાથી લોકોનું ધ્યાન હટાવવા માટે ભારતની સરહદ પર ઉશ્કેરણીજનક કાર્યવાહી કરવાની યોજના બનાવી રહી છે. સૂત્રોના જણાવ્યા અનુસાર, આ અત્યંત વિશ્વસનીય ગુપ્તચર ઇનપુટના આધારે, ભારતીય સશસ્ત્ર દળોને હાઈ એલર્ટ પર મૂકવામાં આવ્યા છે. જવાબમાં, સરહદ પર સૈનિકોની તૈનાતી વધારી દેવામાં આવી છે.

આ ચેતવણી એવા સમયે આવી છે, જ્યારે પાકિસ્તાનના ઉત્તરપશ્ચિમ પ્રાંત ખૈબર પખ્તુનખ્વામાં બળવાખોરી વધી રહી છે. લાંબા સમયથી પાકિસ્તાની સેના દ્વારા કથિત દમનકારી કાર્યવાહીનો સામનો કરી રહેલા સ્થાનિક પશ્તુન સમુદાયે ખુલ્લેઆમ બળવો કર્યો છે. તાજેતરના અઠવાડિયામાં, તહરીક-એ-તાલિબાન પાકિસ્તાન (TTP) અને અન્ય આતંકવાદી જૂથોએ સેના સામે અનેક હુમલાઓ કર્યા છે.

પાકિસ્તાની સેનાના ISPR (ઇન્ટર-સર્વિસિસ પબ્લિક રિલેશન્સ) એ આ હુમલાઓને *ઈંન્ડિયન પ્રોક્સી ફિત્ના અલ ખારિજ* તરીકે વર્ણવ્યા છે, પરંતુ સ્થાનિક લોકો તેને પંજાબી પ્રભુત્વ ધરાવતી સેના દ્વારા કરવામાં આવેલા અત્યાચારો ગણાવી રહી છે. અફઘાનિસ્તાનની સરહદે આવેલું ખૈબર પખ્તુનખ્વા લાંબા સમયથી આતંકવાદનું કેન્દ્ર રહ્યું છે, અને પાકિસ્તાની સેના આ આંતરિક બળવામાં ફસાયેલી છે. એવી આશંકા છે કે, પાકિસ્તાન સ્થાનિક પરિસ્થિતિ પરથી ધ્યાન હટાવવા માટે નિયંત્રણ રેખા (LoC) અથવા આંતરરાષ્ટ્રીય સરહદ પર ઉશ્કેરણીજનક કાર્યવાહી કરી શકે છે.આ વિશ્વસનીય ગુપ્તચર અહેવાલો બાદ, ભારતીય સેનાને તાત્કાલિક એલર્ટ પર મૂકવામાં આવી છે. તમામ આગળની જગ્યાઓ પર દેખરેખ વધારી દેવામાં આવી છે, અને સરહદી વિસ્તારોમાં સુરક્ષા વધારી દેવામાં આવી છે. લશ્કરી સૂત્રો કહે છે કે, ભારતીય સશસ્ત્ર દળો કોઈપણ પરિસ્થિતિનો સામનો કરવા માટે સંપૂર્ણપણે તૈયાર છે અને દુશ્મનની કોઈપણ કાર્યવાહીનો કડક જવાબ આપશે.

સેનાએ હજુ સુધી આ બાબતે કોઈ સત્તાવાર નિવેદન બહાર પાડ્યું નથી, પરંતુ સંરક્ષણ નિષ્ણાતો માને છે કે, પાકિસ્તાનમાં રાજકીય અસ્થિરતા અને વ્યાપક જાહેર અસંતોષ વચ્ચે સરહદ પર તણાવ વધારવાની રણનીતિ નવી નથી. ભારતે સરહદ પર શાંતિ જાળવવાની પોતાની પ્રતિબદ્ધતાનો પુનરોચ્ચાર કર્યો છે, પરંતુ એ પણ સ્પષ્ટ કર્યું છે કે, સુરક્ષા અંગે કોઈ પણ પ્રકારની ગફલત રાખવામાં આવશે નહીં.સૂત્રોના જણાવ્યા પ્રમાણે, ભારતીય સેના સરહદ પારની તમામ પ્રવૃત્તિઓ પર નજીકથી નજર રાખી રહી છે અને સેના, ગુપ્તચર એજન્સીઓ અને હવાઈ સંરક્ષણ નેટવર્ક વચ્ચે સંકલન મજબૂત બનાવવામાં આવ્યું છે. સુરક્ષા એજન્સીઓ સતત પરિસ્થિતિ પર નજર રાખી રહી છે અને કોઈપણ સંભવિત ખતરાના કિસ્સામાં તાત્કાલિક કાર્યવાહી કરવા માટે તૈયાર છે.