આનંદપુર સાહિબ (પંજાબ) : શીખ ધર્મના 9મા ગુરુ શ્રી ગુરુ તેગ બહાદુર સાહેબજીની 350મી શહીદ જયંતીના ભવ્ય સમાપન સમારોહમાં દિલ્હીના પૂર્વ મુખ્યમંત્રી અને AAPના રાષ્ટ્રીય સંયોજક અરવિંદ કેજરીવાલે હાજરી આપી હતી. આ પ્રસંગે કેજરીવાલે સંપૂર્ણ પ્રમાણિકતા સાથે શાસન ચલાવવાના સંકલ્પનો પુનરોચ્ચાર કર્યો હતો.
કેજરીવાલે ગુરુ નાનક દેવજીના ઉપદેશ "નામ જપો, કિરત કરો, વંદ છકો"નું પાલન કરવાની વાત કરી. તેમણે પોતાના સંબોધનમાં ભારપૂર્વક કહ્યું, "અમે સંપૂર્ણ પ્રામાણિકતાથી સરકાર ચલાવી રહ્યા છીએ. લોકો અમને પૂછે છે કે આટલા પૈસા ક્યાંથી આવે છે, આટલા મોટા કામો કેવી રીતે થઈ રહ્યા છે. તેનું કારણ એ છે કે અમે ગુરુ સાહેબે બતાવેલા માર્ગ પર સંપૂર્ણ પ્રામાણિકતાથી ચાલી રહ્યા છીએ."
ભ્રષ્ટાચાર અંગે પોતાના વલણ પર સ્પષ્ટતા કરતા તેમણે કહ્યું, "ચૂંટણી દરમિયાન મેં વચન આપ્યું હતું કે સરકારી તિજોરીનો એક-એક પૈસો જનતા માટે વપરાશે. જો અમે એક પણ પૈસાની અપ્રમાણિકતા કરી હોય, તો ગુરુ મહારાજ આપણને જે પણ સજા આપે તે અમને સ્વીકાર્ય છે."
કેજરીવાલે વધુમાં જણાવ્યું કે 70 વર્ષ પછી, તેમની સરકારે નહેરનું પાણી ખેતરો સુધી પહોંચાડ્યું છે અને શાળાઓ તેમજ હોસ્પિટલોમાં સુધારો કર્યો છે. તેમણે કહ્યું કે તેઓ પૈસા નહીં, પરંતુ પુણ્ય કમાયા છે.
ધર્મ અને સમાજ માટે સંદેશ: અરવિંદ કેજરીવાલે ધાર્મિક સંઘર્ષો પર ચિંતા વ્યક્ત કરી. તેમણે કહ્યું કે આજે આપણા દેશમાં ધર્મના નામે યુદ્ધો લડાઈ રહ્યા છે, પરંતુ જો આપણે ગુરુ સાહેબજીના સંદેશને અપનાવીશું, તો બધા સંઘર્ષો કાયમ માટે સમાપ્ત થઈ જશે. તેમણે ગુરુ તેગ બહાદુરજીના હિન્દુ ધર્મના રક્ષણ માટે આપેલા સર્વોચ્ચ બલિદાનને યાદ કર્યું હતું.
આ ઉપરાંત, તેમણે જાહેરાત કરી કે ગઈકાલે વિધાનસભા સત્રમાં ત્રણ પવિત્ર શહેરોને "પવિત્ર શહેરો"નો દરજ્જો આપવામાં આવ્યો છે, જ્યાં દારૂ, માંસ, ગુટખા અને તમાકુના વેચાણ પર સંપૂર્ણપણે પ્રતિબંધ મૂકવામાં આવશે. ગુરુ તેગ બહાદુર સાહેબજીના નામે આનંદપુર સાહિબમાં એક વિશ્વ કક્ષાની યુનિવર્સિટી પણ બનાવવામાં આવશે.