રાજસ્થાનના ચિત્તોડગઢ સ્થિત સુપ્રસિદ્ધ કૃષ્ણધામ શ્રી સાંવલિયા શેઠના મંદિરે દાનની બાબતમાં એક નવો જ કીર્તિમાન સ્થાપિત કર્યો છે. ૧૯ નવેમ્બરથી શરૂ થયેલી દાનપેટીની ગણતરીમાં મંગળવારે માત્ર ચાર રાઉન્ડની ગણતરી પૂર્ણ થઈ ત્યાં જ ૩૬ કરોડ રૂપિયાથી વધુની જંગી રકમ મળી આવી છે. આ સાથે જ મંદિરના ઈતિહાસમાં અત્યાર સુધીનું સૌથી મોટું દાન પ્રાપ્ત થયું છે. 

હજુ ગણતરી ચાલુ હોવાથી અને ઓનલાઈન તેમજ સોના-ચાંદીની આવક ઉમેરવાની બાકી હોવાથી આ આંકડો ૪૦ કરોડને પાર કરી જાય તેવી પ્રબળ શક્યતા છે.

રાજસ્થાનના મેવાડ પંથકમાં આવેલા મંડફિયા સ્થિત શ્રી સાંવલિયા શેઠનું મંદિર ભક્તોની અપાર શ્રદ્ધાનું કેન્દ્ર છે. અહીં ચતુર્દશીના પવિત્ર દિવસે ભગવાનનો ભંડાર (દાનપેટી) ખોલવામાં આવે છે. 

આ વખતે ૧૯ નવેમ્બરથી ગણતરી શરૂ કરવામાં આવી હતી. મંગળવારે ગણતરીના ચોથા રાઉન્ડના અંતે કુલ ૩૬ કરોડ ૧૩ લાખ ૬૦ હજાર રૂપિયા રોકડા નીકળ્યા હતા. આ રકમ બહાર આવતા જ મંદિર પ્રશાસન અને ભક્તોમાં અચરજ અને આનંદની લાગણી ફેલાઈ ગઈ હતી, કારણ કે હજુ ગણતરી પ્રક્રિયા પૂર્ણ થઈ નથી અને આજે બુધવારે, ૨૬ નવેમ્બરે પણ ગણતરી ચાલુ રાખવામાં આવી છે.

મંદિર મંડળના જણાવ્યા અનુસાર, આ પહેલાનો રેકોર્ડ વર્ષ ૨૦૨૪ માં દિવાળી બાદ ખોલવામાં આવેલા ભંડારનો હતો. તે સમયે બે મહિનાના અંતરાલ બાદ દાનપેટી ખોલવામાં આવી હતી ત્યારે ૩૪ કરોડ ૯૧ લાખ ૯૫ હજાર ૮ રૂપિયા પ્રાપ્ત થયા હતા. મંગળવારે મળેલ ૩૬ કરોડની રકમે તે જૂના રેકોર્ડને તોડી નાખ્યો છે. 

વિશેષ વાત એ છે કે અત્યારે જે આંકડો સામે આવ્યો છે તે માત્ર દાનપેટીમાંથી નીકળેલી રોકડ રકમ છે. ભક્તો દ્વારા ચેક, મનીઓર્ડર અને ઓનલાઈન માધ્યમથી આપવામાં આવેલું દાન તેમજ ભેટ રૂપે મળેલું સોનું અને ચાંદી ગણવાના હજુ બાકી છે. જ્યારે આ તમામનો સરવાળો કરવામાં આવશે ત્યારે કુલ દાન ઐતિહાસિક સપાટીએ પહોંચશે.

સાંવલિયા શેઠને ભક્તો અને ખાસ કરીને વેપારીઓ પોતાના 'શેઠ' કે ભાગીદાર માને છે. માન્યતા છે કે વેપારમાં ભગવાનને ભાગીદાર બનાવવાથી નફામાં વૃદ્ધિ થાય છે, તેથી દેશભરમાંથી આવતા વેપારીઓ પોતાના નફાનો અમુક હિસ્સો અહીં દાનપેટીમાં અર્પણ કરે છે. મંદિર સમિતિના અંદાજ મુજબ, જ્યારે અંતિમ ગણતરી પૂર્ણ થશે ત્યારે દાનનો કુલ આંકડો ૪૦ કરોડ રૂપિયાથી પણ વધી જશે, જે અત્યાર સુધીના મંદિરના ઈતિહાસમાં એક સીમાચિહ્નરૂપ ઘટના બની રહેશે. 

ભારે સુરક્ષા વ્યવસ્થા વચ્ચે ચાલી રહેલી આ ગણતરીમાં મંદિર બોર્ડના સભ્યો અને બેંકના કર્મચારીઓ દિવસ-રાત જોડાયેલા રહે છે.