સોફટવેર એન્જિનિયરે સેક્સલાઇફ સુધારવાના ચક્કરમાં ૪૮ લાખ ગુમાવ્યા
બનાવટી આયુર્વેદિક ગુરુજીએ બરાબરનો લૂંટી લીધોઃ પોતાના પૈસા ખૂટયા તો ૨૦ લાખની લોન લીધી, ફ્રેન્ડ પાસેથી ૧૦ લાખ રૂપિયા ઉધાર લીધાઃ બોગસ દવાથી કિડનીને પણ નુકસાન
બેન્ગલોર,તા.૨૬: બેન્ગલોરમાં ૨૯ વર્ષના તેજસ નામના એક સોફટવેર એન્જિનિયરે પોલીસમાં ફરિયાદ નોંધાવી છે કે આયુર્વેદિક ડોક્ટર હોવાનો દાવો કરીને વિજયલક્ષ્મી આયુર્વેદિક દુકાનના માલિક વિજય ગુરુજીએ સેક્સ સંબંધિત સમસ્યાઓની સારવારના નામે હાનિકારક દવાઓ વેચીને તેની સાથે આશરે ૪૮ લાખ રૂપિયાની છેતરપિડી કરી છે. પોલીસે ફર્સ્ટ ઇન્ફર્મેશન રિપોર્ટ (FIR) નોંધીને વધુ તપાસ હાથ ધરી છે.
FIRમાં જણાવવામાં આવ્યા મુજબ તેજસનાં લગ્ન ૨૦૨૩માં થયાં હતાં અને તેને જાતીય સમસ્યાઓ થવા લાગી હતી. તે એક મલ્ટિસ્પેશ્યલિટી હોસ્પિટલમાં સારવાર લઈ રહ્યો હતો. આ વર્ષે ત્રીજી મેએ રસ્તા પર ચાલતી વખતે તેણે એક તંબુ જોયો જેમાં જાતીય સમસ્યાઓના તાત્કાલિક ઉકેલોની જાહેરાત કરવામાં આવી હતી. તંબુની અંદર રહેલા એક માણસે તેને કહ્યું કે વિજય ગુરુજી તેને સાજો કરી શકે છે. ગુરુજીએ કથિત રીતે તેની તપાસ કરી અને દેવરાજ બુટી નામની આયુર્વેદિક દવા લખી આપીને દાવો કર્યો કે એ ફક્ત તેના સ્ટોર પર જ ઉપલબ્ધ છે અને એની કિંમત ૧,૬૯,૦૦૦ રૂપિયા પ્રતિ ગ્રામ છે.
તેજસને ફક્ત રોકડમાં ચુકવણી કરવાનું અને ઑનલાઇન ચુકવણી ટાળવાનું કહેવામાં આવ્યું હતું. તેણે વિશ્વાસ કરીને દવા ખરીદી હતી અને બાદમાં તેને ભવન બુટી નામનું તેલ આપવામાં આવ્યું હતું જેની કિમત ૭૬,૦૦૦ રૂપિયા પ્રતિ ગ્રામ હતી. માત્ર કેટલાંક અઠવાડિયાંમાં તેણે વિજય ગુરુજીના કહેવાથી વિવિધ દવાઓ પર ૧૭ લાખ રૂપિયા ખર્ચ્યા હતા. પાછળથી તેને વધુ દેવરાજ બુટી ખરીદવા દબાણ કરવામાં આવ્યું અને ચેતવણી આપવામાં આવી હતી કે તે દવા નહીં લે તો અગાઉની સારવાર કામ કરશે નહીં. આ પછી એન્જાિનિયરે બેન્કમાંથી ૨૦ લાખ રૂપિયાની લોન લઈને ૧૮ ગ્રામ આયુર્વેદિક દવા ખરીદી હતી. તેણે એવો પણ આરોપ લગાવ્યો કે તેને બીજી પ્રોડક્ટ દેવરાજ રસબુટી ૨,૬૦,૦૦૦ પ્રતિ ગ્રામના ભાવે ખરીદવા માટે સમજાવવામાં આવ્યો, જેના માટે તેણે એક મિત્ર પાસેથી ૧૦ લાખ રૂપિયા ઉધાર લીધા હતા. તેણે આ આયુર્વેદિક દુકાનમાંથી આશરે ૪૮ લાખ રૂપિયાની દવા ખરીદી હતી.
એન્જિનિયરને લખી આપેલી દવાઓ તેણે યોગ્ય રીતે લીધી હોવા છતાં કોઈ સુધારો જોવા મળ્યો નહોતો. તેનો એવો આરોપ છે કે તેની કિડની પાછળથી ફેલ થઈ ગઈ હતી. આ થવાનું કારણ આયુર્વેદિક દુકાનમાંથી ખરીદેલી દવાઓ હતી એવો એન્જીિનિયરનો દાવો છે. તેણે આ મુદ્દે આ વિજય ગુરુજીને સવાલ કર્યો ત્યારે તેને કથિત રીતે ધમકી આપવામાં આવી અને કહેવામાં આવ્યું કે જો તે સારવાર બંધ કરશે તો તેની હાલત વધુ ખરાબ થઈ શકે છે અને તેના જીવને જોખમ થઈ શકે છે.
(10:58 AM IST)
છેલ્લા 8 દિવસમાં સૌથી લોકપ્રિય 
