રશિયા:લગભગ ચાર વર્ષ ચાલેલા યુદ્ધને સમાપ્ત કરવા માટે અમેરિકા અને રશિયા વચ્ચેના પ્રયાસો વધુ તીવ્ર બન્યા છે. યુએસ પ્રમુખ ડોનાલ્ડ ટ્રમ્પે મંગળવારે કહ્યું હતું કે યુક્રેનમાં યુદ્ધ સમાપ્ત કરવાની તેમની યોજના "સારી રીતે ઘડવામાં આવી છે". તેઓ તેમના રાજદૂત સ્ટીવ વિટકોફને રશિયન રાષ્ટ્રપતિ વ્લાદિમીર પુતિન સાથે મુલાકાત માટે મોકલી રહ્યા છે, જ્યારે આર્મી સેક્રેટરી ડેન ડ્રિસ્કોલ યુક્રેનિયન અધિકારીઓ સાથે મુલાકાત કરશે.

યુએસ આર્મી સેક્રેટરી ડેન ડ્રિસ્કોલે રશિયન અધિકારીઓ સાથે આ વાટાઘાટો કરી હતી. ડ્રિસ્કોલના પ્રવક્તા, લેફ્ટનન્ટ કર્નલ જેફ ટોલબર્ટે જણાવ્યું હતું કે, "સોમવાર રાત્રે અને મંગળવારે, સેક્રેટરી ડ્રિસ્કોલ અને તેમની ટીમે અબુ ધાબીમાં રશિયન પ્રતિનિધિમંડળ સાથે યુક્રેનમાં કાયમી શાંતિ પ્રાપ્ત કરવાના મુદ્દા પર ચર્ચા કરી હતી. અને વાટાઘાટો ખૂબ સારી રહી.વાતચીતમાં બરાબર શું ચર્ચા થઈ હાલ તે સ્પષ્ટ નથી થયુ. એક યુએસ અધિકારીએ જણાવ્યું હતું કે ડ્રિસ્કોલ અબુ ધાબીમાં યુક્રેનિયન અધિકારીઓ સાથે પણ મુલાકાત કરી શકે છે.

ટ્રમ્પે યુક્રેનને આ શરતો સાથે શાંતિ યોજના સ્વીકારવા માટે ૨૭ નવેમ્બર સુધીનો સમય આપ્યો છે. દરમિયાન, યુક્રેનિયન રાષ્ટ્રપતિ ઝેલેન્સકીએ કહ્યું છે કે તેઓ રાષ્ટ્રપતિ ટ્રમ્પ સાથે સંવેદનશીલ મુદ્દાઓ પર ચર્ચા કરશે. ઝેલેન્સકીએ યુરોપિયન નેતાને યુક્રેનમાં "આશ્વાસન દળ" તૈનાત કરવા માટે માળખા પર વાટાઘાટો કરવા અને મોસ્કો યુદ્ધનો અંત લાવવાની ઇચ્છાશક્તિ દર્શાવે ત્યાં સુધી યુક્રેનને ટેકો આપવાનું ચાલુ રાખવા વિનંતી કરી છે.

અમેરિકાએ યુક્રેન માટે ૨૮-મુદ્દાની શાંતિ યોજનાનો મુસદ્દો તૈયાર કર્યો છે જેનો હેતુ યુદ્ધનો અંત લાવવાનો છે. તેમાં યુક્રેન માટે યુદ્ધ દરમિયાન રશિયા દ્વારા કબજે કરાયેલા ડોનેટ્સક અને લુહાન્સ્ક પ્રાંતો પરનો પોતાનો દાવો છોડી દેવા, તેનું લશ્કરી કદ ઘટાડવા, નાટોમાં જોડાવાની ઇચ્છા છોડી દેવા અને યુદ્ધ સમાપ્ત થયા પછી યુરોપિયન સૈનિકો તૈનાત કરવાથી દૂર રહેવાની શરતોનો સમાવેશ થાય છે.