હોંગકોંગના તાઈ પો જિલ્લામાં આવેલી બહુમાળી રહેણાંક ઇમારતોના સંકુલમાં લાગેલી ભીષણ આગને પગલે ભારે જાનહાનિ થઈ છે. સ્થાનિક અધિકારીઓએ આપેલી માહિતી મુજબ, આ કરૂણ ઘટનામાં અત્યાર સુધીમાં ઓછામાં ઓછા ૩૬ લોકોના મૃત્યુની પુષ્ટિ થઈ છે, જ્યારે ૨૭૯ જેટલા લોકો હજુ પણ લાપતા હોવાનું જાણવા મળ્યું છે. આ દાયકાઓમાં હોંગકોંગમાં બનેલી સૌથી ગંભીર આગની ઘટનાઓમાંની એક છે.

ન્યુ ટેરીટરીઝ વિસ્તારના તાઈ પો જિલ્લામાં આવેલા વાંગ ફુક કોર્ટ નામના રહેણાંક સંકુલમાં બુધવારે બપોરે આગ લાગવાની શરૂઆત થઈ હતી. જોરદાર પવન અને ઇમારતોની બહાર લગાવેલા વાંસના પાલખ (સ્કેફોલ્ડિંગ)ને કારણે આગે વિકરાળ સ્વરૂપ ધારણ કર્યું હતું અને જોતજોતામાં અનેક ઊંચા ટાવરોમાં ફેલાઈ ગઈ હતી. આ આગ એટલી ભયાનક હતી કે બચાવ કામગીરી માટે તેને સર્વોચ્ચ 'પાંચ-એલાર્મ' શ્રેણીમાં મૂકવામાં આવી હતી.

હોંગકોંગના મુખ્ય વહીવટી અધિકારી  જ્હોન લીએ આ દુર્ઘટનાને શહેર માટે એક ગંભીર કરુણાંતિકા ગણાવી છે. સત્તાવાર આંકડા મુજબ ૩૬ લોકોના મોત થયા છે, જેમાં ફરજ દરમિયાન શહીદ થયેલા એક ૩૭ વર્ષીય અગ્નિશમન દળના કર્મચારીનો પણ સમાવેશ થાય છે જ્યારે ૨૭૯ લોકો હજુ પણ લાપતા છે, જેમને શોધવા માટે ટીમો રાતભર કામ કરી રહી છે. ૨૯ જેટલા લોકોને હોસ્પિટલમાં દાખલ કરવામાં આવ્યા છે, જેમાંથી ૭ લોકોની હાલત અત્યંત નાજુક છે.

બચાવ કામગીરીમાં ૭૫૦ થી વધુ કર્મચારીઓ અને ૧૨૮ ફાયર એન્જિનોને કામે લગાડવામાં આવ્યા છે. આ રહેણાંક સંકુલમાં લગભગ ૨,૦૦૦ ઍપાર્ટમેન્ટ્સ આવેલા છે અને અહીં આશરે ૪,૮૦૦ લોકો રહે છે. ઇમારતો જૂની હોવાથી અને હાલમાં તેના પર નવીનીકરણનું કામ ચાલી રહ્યું હોવાથી બહારની તરફ વાંસના પાલખ લગાવેલા હતા, જે આગને ઝડપથી ફેલાવવામાં વિલન બન્યા હતા.

બચાવ ટુકડીઓએ જણાવ્યું કે, આગને કારણે ઇમારતોની અંદરનું તાપમાન ખૂબ ઊંચું છે અને કાટમાળ તેમજ બળી ગયેલા પાલખ નીચે પડી રહ્યા છે, જેના કારણે બચાવ કામગીરીમાં ગંભીર મુશ્કેલીઓનો સામનો કરવો પડી રહ્યો છે. લાપતા થયેલા લોકોમાં મોટી સંખ્યામાં વૃદ્ધો હોવાની પણ આશંકા છે. આ ઘટના બાદ સરકારે અસ્થાયી આશ્રયસ્થાનો ખોલ્યા છે જ્યાં બેઘર બનેલા રહેવાસીઓને રહેવાની વ્યવસ્થા પૂરી પાડવામાં આવી રહી છે.

ચીનના રાષ્ટ્રપતિ શી જિનપિંગે પણ આ દુર્ઘટના પર શોક વ્યક્ત કર્યો છે અને સ્થાનિક અધિકારીઓને રાહત તથા બચાવ કામગીરી ઝડપથી પૂર્ણ કરવા વિનંતી કરી છે. આગ લાગવાનું ચોક્કસ કારણ જાણવા માટે તપાસ શરૂ કરવામાં આવી છે.