નવી દિલ્‍હી, તા.૨૭: એન્‍ફોર્સમેન્‍ટ ડિરેક્‍ટોરેટ એ દેશભરમાં મેડિકલ કોલેજોને મંજૂરી આપવાના મામલે ચાલી રહેલા લાંચ અને ભ્રષ્ટાચારના કૌભાંડમાં મોટી કાર્યવાહી હાથ ધરી છે. EDની ટીમે એકસાથે દિલ્‍હી, ઉત્તર પ્રદેશ, મહારાષ્‍ટ્ર, ગુજરાત સહિત ૧૦ રાજ્‍યોના ૧૫ સ્‍થળોએ દરોડા પાડ્‍યા હતા. આ કાર્યવાહી પ્રિવેન્‍શન ઓફ મની લોન્‍ડરિંગ એક્‍ટ હેઠળ કરવામાં આવી છે, જેનો હેતુ ભ્રષ્ટાચાર દ્વારા કમાયેલા કાળા નાણાંના મૂળિયાં સુધી પહોંચવાનો છે. દરોડા પાડવામાં આવેલા સ્‍થળોમાં સાત મેડિકલ કોલેજોના પરિસર અને FIR માં આરોપી તરીકે નામ આપવામાં આવેલા કેટલાક ખાનગી વ્‍યક્‍તિઓના રહેઠાણોનો સમાવેશ થાય છે.

ED ની આ કાર્યવાહી જૂનમાં સેન્‍ટ્રલ બ્‍યુરો ઓફ ઇન્‍વેસ્‍ટિગેશન દ્વારા નોંધાયેલી ૨૨૫ FIR ના સંદર્ભમાં કરવામાં આવી છે, જે ભારતમાં તબીબી શિક્ષણના નિયમન કરતી સર્વોચ્‍ચ સંસ્‍થા - રાષ્‍ટ્રીય તબીબી આયોગના અધિકારીઓ પર લાંચ લેવાનો આરોપ મૂકે છે. આરોપ મુજબ, NMC અધિકારીઓ સહિતના સરકારી કર્મચારીઓ અને અધિકારીઓએ લાંચના બદલામાં મેડિકલ કોલેજના નિરીક્ષણ સંબંધિત ગુપ્ત માહિતી મુખ્‍ય મેનેજરો અને મધ્‍યસ્‍થીઓને આપી હતી. આ ગુપ્ત માહિતીનો ઉપયોગ કોલેજોને તેમના શૈક્ષણિક અભ્‍યાસક્રમો ચલાવવા માટેના માપદંડોમાં ફેરફાર કરવા અને જરૂરી મંજૂરીઓ મેળવવામાં મદદ કરવા માટે કરવામાં આવ્‍યો હતો.

આ કેસ માત્ર લાંચ પૂરતો સીમિત નથી, પરંતુ તે ભારતમાં મેડિકલ શિક્ષણની ગુણવત્તા અને સ્‍ટાન્‍ડર્ડ પર ગંભીર પ્રશ્‍નાર્થ ઊભા કરે છે. જ્‍યારે લાંચ આપીને મેડિકલ કોલેજો માપદંડોમાં ફેરફાર કરી મંજૂરી મેળવે છે, ત્‍યારે તે સીધો અસર વિદ્યાર્થીઓના શિક્ષણ અને આખરે દેશના આરોગ્‍ય માળખા પર પડે છે. ED હવે આ સમગ્ર નેટવર્કના નાણાકીય પાસાઓની તપાસ કરી રહ્યું છે કે લાંચની આ રકમ કયાંથી આવી, કયાં ખર્ચાઈ અને તેને સફેદ કરવા માટે કયા માર્ગોનો ઉપયોગ કરવામાં આવ્‍યો હતો. આ કાર્યવાહીથી તબીબી શિક્ષણ ક્ષેત્રે ચાલી રહેલા ભ્રષ્ટાચારના એક મોટા પડદાને દૂર કરવાની અપેક્ષા છે.

EDના દરોડા માત્ર દિલ્‍હી કે ઉત્તર પ્રદેશ પૂરતા સીમિત ન રહેતા દક્ષિણના રાજ્‍યો આંધ્ર પ્રદેશ અને તેલંગાણા તેમજ પﾍમિના ગુજરાત અને મહારાષ્‍ટ્ર સુધી ફેલાયેલા છે. આ વ્‍યાપક કાર્યવાહી દર્શાવે છે કે કથિત ભ્રષ્ટાચારનું નેટવર્ક દેશભરમાં ફેલાયેલું હતું. PMLA હેઠળની તપાસમાં જો મની લોન્‍ડરિંગના પુરાવા મળશે, તો આરોપીઓની સંપત્તિ જપ્ત થઈ શકે છે અને તેમને કડક સજા થઈ શકે છે. સરકારી અધિકારીઓ અને મેડિકલ કોલેજોના સંચાલકોને સંડોવતા આ હાઈ-પ્રોફાઈલ કેસમાં આવનારા દિવસોમાં અનેક મોટા ખુલાસા થવાની સંભાવના છે.