નવી દિલ્હી : દિલ્હીના સંગમ વિહાર વિસ્તારમાં શનિવારે સાંજે એક ભીષણ આગની ઘટના બની છે, જેમાં ચાર માળની એક ઇમારત આગની લપેટમાં આવી જતાં ત્રણ લોકોના કરુણ મોત થયા છે. આ ઘટનામાં કેટલાક લોકો દાઝી જવાના પણ અહેવાલો છે.

દિલ્હી પોલીસને સાંજે ૬:૨૪ વાગ્યે ટિગ્રી એક્સટેન્શન બ્લોક B માં આગ લાગી હોવાનો કૉલ મળ્યો હતો. પોલીસ ટીમો તરત જ ઘટનાસ્થળે પહોંચી ત્યારે આખી ચાર માળની ઇમારત આગમાં લપેટાયેલી જોવા મળી હતી. અહેવાલો અનુસાર, ઇમારતના ગ્રાઉન્ડ ફ્લોર પર આવેલી જૂતાની દુકાનમાં આગ લાગી અને ઝડપથી સમગ્ર ઇમારતમાં ફેલાઈ ગઈ હતી.

બે ઘાયલ મહિલાઓનો બચાવ: પોલીસ અને ફાયર ફાઇટરની ટીમોએ ત્વરિત કાર્યવાહી કરીને આગ પર કાબૂ મેળવવાનો પ્રયાસ કર્યો હતો. આ દુર્ઘટનામાં ત્રણ લોકોના મોત થયા હોવાની પુષ્ટિ થઈ છે. જોકે, દિલ્હી પોલીસે બહાદુરી બતાવીને બે ઘાયલ મહિલાઓને સમયસર બચાવી લીધી હતી અને તેમને તાત્કાલિક હોસ્પિટલમાં દાખલ કરવામાં આવી હતી.

દિલ્હી પોલીસે જણાવ્યું છે કે ઘટનાની સંપૂર્ણ અને તકનીકી તપાસ કરવા માટે ક્રાઇમ અને ફોરેન્સિક ટીમોને બોલાવવામાં આવી છે અને વધુ તપાસ ચાલી રહી છે.

નારાયણામાં પણ અગાઉ આગની ઘટના: ઉલ્લેખનીય છે કે, આ મહિનાની શરૂઆતમાં સોમવારે મોડી રાત્રે પશ્ચિમ દિલ્હીના નારાયણામાં પણ એક મોટી આગની ઘટના બની હતી. ત્યાં ત્રણ માળની ઇમારત આગ લાગ્યા બાદ ધરાશાયી થઈ ગઈ હતી. તે ઇમારતમાં પેઇન્ટ અને ઇલેક્ટ્રિકલ ગુડ્સનું વેરહાઉસ હતું, જેના માલિક રોહન કાટમાળ નીચે ફસાયા હોવાની આશંકા વ્યક્ત કરવામાં આવી હતી. નારાયણામાં ૨૬ ફાયર એન્જિનોએ સવારે ૮ વાગ્યા સુધીમાં આગ પર કાબૂ મેળવ્યો હતો.