કોલંબો: શ્રીલંકામાં 'દિત્વાહ' ચક્રવાતે ભારે વિનાશ વેર્યો છે, જેના કારણે આવેલા વિનાશક પૂર અને ભૂસ્ખલનમાં ઓછામાં ઓછા ૧૫૩ લોકોના મોત થયા છે અને ૧૯૧ લોકો હજુ પણ ગુમ છે. આ ભયાનક પરિસ્થિતિમાં ભારતે તરત જ 'ઓપરેશન સાગર બંધુ' શરૂ કરીને શ્રીલંકાને તાત્કાલિક માનવતાવાદી સહાય અને આપત્તિ રાહત સામગ્રી પહોંચાડી છે.
શ્રીલંકાના ટાપુ રાષ્ટ્રમાં 'દિત્વાહ' વાવાઝોડાને કારણે જનજીવન અસ્તવ્યસ્ત થઈ ગયું છે. ભારે વરસાદ અને ભૂસ્ખલનને કારણે ૭,૭૦,૦૦૦થી વધુ લોકો પ્રભાવિત થયા છે, જ્યારે ૧,૦૦,૦૦૦થી વધુ લોકો વિસ્થાપિત થતાં તેમને તેમના ઘરો છોડવાની ફરજ પડી છે. મૃત્યુઆંક ૧૫૩ પર પહોંચી ગયો છે અને ૧૯૧ લોકો લાપતા હોવાથી મૃત્યુઆંક વધવાની આશંકા છે.
પ્રમુખ અનુરા કુમારા દિસાનાયકેએ દેશમાં કટોકટીની સ્થિતિ જાહેર કરી છે. માર્ગો અવરોધિત હોવા અને વીજળી ગુલ થવા છતાં રાહત અને બચાવના પ્રયાસો ચાલુ છે.
ભારતની 'ઓપરેશન સાગર બંધુ' હેઠળ મદદ
ભારતે તેના 'પડોશી પ્રથમ'ની આગવી પરંપરા મુજબ અને વિઝન 'મહાસાગર' ને અનુરૂપ, શ્રીલંકાને મદદ કરવા માટે ત્વરિત પગલાં લીધા છે. વડાપ્રધાન નરેન્દ્રભાઈ મોદીએ જાનહાનિ પર ઊંડું દુઃખ વ્યક્ત કર્યું છે અને સંપૂર્ણ એકતા વ્યક્ત કરી છે.
 * ભારતે 'ઓપરેશન સાગર બંધુ' હેઠળ તાત્કાલિક સહાય મોકલી છે.
 * પ્રથમ તબક્કામાં, ભારતીય નૌકાદળના જહાજો આઈએનએસ વિક્રાંત અને આઈએનએસ ઉદયગિરિએ કોલંબો ખાતે રાહત સામગ્રી શ્રીલંકાના અધિકારીઓને સોંપી હતી.
 * ભારતીય વાયુસેનાના સી-૧૩૦ જે વિમાન દ્વારા પણ ૧૨ ટન જેટલી માનવતાવાદી સહાય કોલંબો પહોંચાડવામાં આવી.
 * કુલ મળીને, ભારતે અત્યાર સુધીમાં તંબુઓ, ધાબળા, તૈયાર ભોજન, સ્વચ્છતા કીટ અને અન્ય જીવનજરૂરી ચીજવસ્તુઓ સહિત ૨૭ ટનથી વધુ પુરવઠો હવાઈ અને દરિયાઈ માર્ગે મોકલ્યો છે.
 * ૮૦થી વધુ નેશનલ ડિઝાસ્ટર રિસ્પોન્સ ફોર્સના જવાનો અને વિશેષજ્ઞ બચાવ ટુકડીઓને પણ મોકલવામાં આવી છે, જેમણે કોલંબો નજીક અનેક લોકોના જીવ બચાવ્યા છે.
 *પાકિસ્તાન અને અમેરિકાએ પણ શ્રીલંકાને મદદ પૂરી પાડીને પ્રાદેશિક એકતા દર્શાવી છે.
ભારત તરફ ચક્રવાતની ગતિ
શ્રીલંકામાં તબાહી મચાવ્યા બાદ હવે 'દિત્વાહ' ચક્રવાત ઉત્તર-પશ્ચિમ દિશામાં ભારત તરફ આગળ વધી રહ્યું છે. ભારતીય હવામાન વિભાગે તમિલનાડુ અને પુડુચેરીના દરિયાકાંઠાના વિસ્તારોમાં ભારે વરસાદ અને તોફાની પવનની ચેતવણી જારી કરી છે.
આ ગંભીર પરિસ્થિતિમાં ભારતે સમયસર સહાય પૂરી પાડીને તેના નજીકના પાડોશી પ્રત્યેની પ્રતિબદ્ધતા ફરી એકવાર સાબિત કરી છે. વધુ સહાય માટે ભારત સતત શ્રીલંકાના સંપર્કમાં છે
લેટેસ્ટ અત્યારે રાત્રે ૧૧ વાગ્યાની ઇન્સેટ ઉપગ્રહની તસવીરમાં વાવાઝોડું દીત્વાહ  ભારતના દક્ષિણ કાંઠે તમિલનાડુ અને પુડુચેરી ઉપરથી પસાર થઈ રહ્યાનું નજરે પડે છે