નવી દિલ્હી: દિલ્હીમાં રવિવારે (૩૦ નવેમ્બર) ૧૨ વોર્ડની મ્યુનિસિપલ કોર્પોરેશન ઓફ દિલ્હી (MCD) પેટાચૂંટણીઓ યોજાવા જઈ રહી છે. તાજેતરમાં દિલ્હી વિધાનસભાની ચૂંટણીમાં પ્રચંડ વિજય મેળવનાર ભાજપ અને આમ આદમી પાર્ટી (AAP) વચ્ચે આ ચૂંટણીને સીધો અને પ્રતિષ્ઠાનો જંગ માનવામાં આવે છે. દિલ્હીમાં સત્તા પરત મેળવ્યા બાદ ભાજપ માટે MCDની આ પેટાચૂંટણીઓ એક અગ્નિપરીક્ષા સમાન છે.
દિલ્હી રાજ્ય ચૂંટણી પંચે માહિતી આપી છે કે, ૩૦ નવેમ્બરના રોજ સવારે ૭:૩૦ વાગ્યે ૫૮૦ મતદાન મથકો પર મતદાન શરૂ થશે અને સાંજે ૫:૩૦ વાગ્યે પૂર્ણ થશે.
મેદાનમાં ૨૬ મહિલાઓ સહિત ૫૧ ઉમેદવારો: આ પેટાચૂંટણીમાં કુલ ૨૬ મહિલાઓ સહિત ૫૧ ઉમેદવારો ચૂંટણી લડી રહ્યા છે. રાજકીય પક્ષો દ્વારા મહિલા ઉમેદવારોને ટિકિટ આપવામાં આવી છે, જેમાં ભાજપે સૌથી વધુ ૮ મહિલા ઉમેદવારોને, AAP એ ૬ અને કોંગ્રેસે ૫ મહિલા ઉમેદવારોને મેદાનમાં ઉતાર્યા છે.
મતદાન પ્રક્રિયા દરમિયાન કડક સુરક્ષા વ્યવસ્થા ગોઠવવામાં આવી છે, જેમાં ૨,૩૨૦ મતદાન કર્મચારીઓ, ૫૮૦ હોમગાર્ડ્સ અને કેન્દ્રીય સશસ્ત્ર પોલીસ દળ (CAPF)ની ૧૩ કંપનીઓ તૈનાત રહેશે.
શાલીમાર બાગ અને દ્વારકા બેઠકો પર જોરદાર સ્પર્ધા: MCD ના કુલ ૧૨ વોર્ડમાંથી, અગાઉ ૯ વોર્ડ પર ભાજપ અને ૩ વોર્ડ પર AAP નો કબજો હતો. આ ચૂંટણીમાં શાલીમાર બાગ ) અને દ્વારકા B જેવી બેઠકો ભાજપ માટે પ્રતિષ્ઠાનો જંગ બની રહેશે.
શાલીમાર બાગ B: આ વોર્ડના કાઉન્સિલર અગાઉ ભાજપના નેતા રેખા ગુપ્તા હતા, જેઓ વિધાનસભા ચૂંટણી જીતીને દિલ્હીના મુખ્યમંત્રી બન્યા છે.
દ્વારકા B: આ વોર્ડનું પ્રતિનિધિત્વ અગાઉ ભાજપના પશ્ચિમ દિલ્હી લોકસભા સાંસદ કમલજીત સેહરાવત કરતા હતા.
દિલ્હીમાં સત્તા ગુમાવ્યા બાદ AAP વોર્ડનો હિસ્સો વધારીને ભાજપને નુકસાન પહોંચાડવાનો પ્રયાસ કરી રહી છે. જોકે, મતદાનની પૂર્વસંધ્યાએ જ AAP ને એક મોટો ફટકો પડ્યો હતો, જ્યારે તેના વરિષ્ઠ નેતા અને બે વખતના ધારાસભ્ય રાજેશ ગુપ્તા ભાજપમાં જોડાયા હતા.
મોડેલ બૂથ અને મતગણતરીની તારીખ: ચૂંટણી પંચે મતદાનનો અનુભવ સુધારવા માટે દરેક વોર્ડમાં એક મોડેલ મતદાન મથક તેમજ 'પિંક બૂથ' સ્થાપિત કર્યા છે. આ 'પિંક બૂથ'નું સંચાલન સંપૂર્ણપણે મહિલાઓ દ્વારા કરવામાં આવશે.
અધિકારીઓના જણાવ્યા મુજબ, મતદાન પ્રક્રિયા પર વેબકાસ્ટિંગ દ્વારા પણ નજર રાખવામાં આવશે. મતદાન મથકો પર પ્રદર્શિત QR કોડ મતદારોને મતદાન કર્યા પછી તાત્કાલિક ઓનલાઈન પ્રતિસાદ આપવા દેશે.
મતદાન પછી સીલબંધ EVM સંગ્રહવા માટે ૧૦ સ્ટ્રોંગ રૂમ-કમ-મતગણતરી કેન્દ્રો સ્થાપવામાં આવ્યા છે. આ પેટાચૂંટણીની મતગણતરી ૩ ડિસેમ્બરના રોજ થશે