હરિયાણાની વીઆઈપી નંબર પ્લેટ 'એચ આર ૮૮ બી ૮૮૮૮ માટે થયેલી રૂ. ૧ કરોડ ૧૭ લાખની બોલી રદ કરવામાં આવી છે. બોલી લગાવનાર વ્યક્તિએ નિયત સમયમર્યાદામાં પૂરી રકમ જમા ન કરાવતા રાજ્યના પરિવહન વિભાગે આ નંબર ફરીથી હરાજી માટે મૂકવાનો નિર્ણય કર્યો છે, જેના કારણે આ નંબર પ્લેટ ભારતની સૌથી મોંઘી રજિસ્ટ્રેશન નંબર પ્લેટ બનવાથી થોડા સમય માટે ચૂકી ગઈ છે.
હરિયાણામાં વાહનો માટેની વીઆઈપી નંબર પ્લેટની હરાજીમાં ઇતિહાસ રચતી બોલી લગાવવામાં આવી હતી, જે હવે વિવાદમાં સપડાઈ છે. ફેન્સી રજિસ્ટ્રેશન નંબર 'એચ આર ૮૮ બી ૮૮૮૮' માટે એક ઓનલાઈન હરાજીમાં રૂ. ૧ કરોડ ૧૭ લાખની રેકોર્ડબ્રેક બોલી લગાવવામાં આવી હતી, જે ભારતમાં કોઈપણ નંબર પ્લેટ માટે લાગેલી અત્યાર સુધીની સૌથી ઊંચી બોલી હતી. આ નંબરને કારણે તે રાષ્ટ્રીય સ્તરે ચર્ચાનું કેન્દ્ર બન્યો હતો.
જોકે, બોલી લગાવનાર વ્યક્તિએ પરિવહન વિભાગ દ્વારા નિર્ધારિત કરવામાં આવેલા સમયગાળાની અંદર બોલીની સંપૂર્ણ રકમ, એટલે કે રૂ. ૧.૧૭ કરોડ, જમા ન કરાવતાં વહીવટી તંત્ર દ્વારા આ બોલીને રદ કરવામાં આવી છે. નિયમ મુજબ, સફળ બોલીદાતાએ ચોક્કસ સમયમાં બાકીની રકમ જમા કરાવવી ફરજિયાત હોય છે. આ ચૂકવણી ન થવાના કારણે પરિવહન પ્રશાસને કડક પગલું લેતાં આ રેકોર્ડબ્રેક બોલીને અમાન્ય ઠેરવી છે.
હવે આ અતિ-મોંઘો અને વીઆઈપી ગણાતો નંબર 'એચ આર ૮૮ બી ૮૮૮૮' ફરીથી હરાજી માટે ઉપલબ્ધ કરવામાં આવશે. જો બોલી લગાવનારે ડિપોઝીટ રકમ ભરી હશે, તો નિયમોનુસાર તે પણ જપ્ત થઈ શકે છે.
મળતી માહિતી મુજબ, આ નંબર સોનીપત જિલ્લાના કુંડલી આરટીઓ હેઠળ નોંધાયેલો છે અને આ સીરીઝમાં ચાર વખત '૮'નો આંકડો આવતો હોવાથી તેની માંગ ઘણી ઊંચી છે, કારણ કે ઘણા લોકો આ આંકડાને શુભ અને સમૃદ્ધિ સાથે જોડે છે. જો આ રકમ જમા થઈ હોત, તો આ નંબર પ્લેટ દેશની સૌથી મોંઘી કાર રજિસ્ટ્રેશન પ્લેટ બની ગઈ હોત.