પટણા:બિહારમાં મહાગઠબંધનમાં તિરાડ પડવાના અહેવાલો વચ્ચે, કોંગ્રેસ પાર્ટી હવે પોતાના આંતરિક સંગઠનને મજબૂત કરવા માટે નિર્ણાયક પગલાં લઈ રહી છે. વર્ષ ૨૦૨૫ની બિહાર વિધાનસભા ચૂંટણીમાં કારમી હારનો સામનો કર્યા બાદ કોંગ્રેસે તેના રાજ્ય એકમને પુનર્જીવિત કરવાની યોજના બનાવી છે. અહેવાલો મુજબ, કોંગ્રેસ લગભગ ૧૪ વર્ષના લાંબા ગાળા પછી તેની નવી પ્રદેશ કોંગ્રેસ સમિતિ (BPCC)ની રચના કરવા જઈ રહી છે.

નવી દિલ્હીમાં મળેલી ચૂંટણી સમીક્ષા બેઠક બાદ પાર્ટીના રાષ્ટ્રીય નેતૃત્વએ BPCCના પુનર્ગઠનનો નિર્દેશ આપ્યો છે. પાર્ટી હાઈકમાન્ડે આ મહત્ત્વપૂર્ણ જવાબદારી પ્રદેશ પ્રમુખ રાજેશ રામ અને રાજ્ય પ્રભારી કૃષ્ણા અલ્લાવારુને સોંપી છે.
૧૪ વર્ષથી સંગઠન હતું સ્થિર: કોંગ્રેસ રાજ્ય સમિતિ છેલ્લે અશોક ચૌધરીના કાર્યકાળ (૨૦૧૩-૨૦૧૭) દરમિયાન વિસ્તૃત કરવામાં આવી હતી, અને ત્યારથી રાજ્ય સ્તરે સંગઠન લગભગ સ્થિર રહ્યું છે. વિધાનસભા ચૂંટણીની સમીક્ષા બેઠક દરમિયાન, ઘણા ઉમેદવારોએ સંગઠનની નબળાઈ, જિલ્લાઓમાં સંકલનનો અભાવ અને કાર્યકરોના સમર્થનના અભાવની ફરિયાદ કરી હતી.
આ ફરિયાદોને ગંભીરતાથી લઈને રાષ્ટ્રીય નેતૃત્વએ પાર્ટીને પુનર્જીવિત કરવા માટે રાજ્ય, જિલ્લા, બ્લોક અને પંચાયત સ્તરે નવી સમિતિઓની રચના કરવાનો નિર્ણય લીધો છે.
મકરસંક્રાંતિ ૨૦૨૬ પછી ઘોષણા: પક્ષના સૂત્રોના જણાવ્યા અનુસાર, નવી રાજ્ય સમિતિની યાદી ૨૦૨૬માં મકરસંક્રાંતિ (ઉત્તરાયણ) પછી જાહેર કરવામાં આવશે. આ પહેલા, રાજ્ય નેતૃત્વને સંગઠનમાં લાયક નેતાઓની યાદી તૈયાર કરવા માટે કહેવામાં આવ્યું છે.
૨૦૧૩ પછી પહેલીવાર આટલો મોટો ફેરફાર થવા જઈ રહ્યો છે. કોંગ્રેસ હવે સંગઠનની નબળાઈને તેની સૌથી મોટી ખામી તરીકે ઓળખી રહી છે અને પાયાના સ્તરે પક્ષને ફરીથી બનાવવાની યોજના પર ઝડપથી કામ કરી રહી છે. આ પુનર્ગઠન બિહાર કોંગ્રેસમાં લાંબા સમય પછી આશાનું નવું કિરણ લાવી શકે છે