નવી દિલ્હી/અમદાવાદ: પ્રધાનમંત્રી શ્રી નરેન્દ્ર મોદીના લોકપ્રિય રેડિયો કાર્યક્રમ 'મન કી બાત'નો 128મો એપિસોડ આજે પ્રસારિત થયો, જેમાં તેમણે નવેમ્બર મહિનાની વિવિધ રાષ્ટ્રીય સિદ્ધિઓ અને સામૂહિક પ્રયાસોને ઉજાગર કર્યા. PM મોદીએ ભારપૂર્વક જણાવ્યું કે, તાજેતરમાં ભારતને કોમનવેલ્થ ગેમ્સના યજમાન તરીકે જાહેર કરવામાં આવ્યું છે, જે દેશ અને તેના નાગરિકો માટે ગૌરવની ક્ષણ છે. આ સિવાય, તેમણે મહિલા ODI વર્લ્ડ કપ અને બ્લાઇન્ડ મહિલા T20 વર્લ્ડ કપ જીતનારી મહિલા ખેલાડીઓની સિદ્ધિઓને પણ બિરદાવી, જે રમતગમતની દુનિયામાં ભારતની વધતી જતી છાપનું પ્રતિબિંબ છે. તેમણે કહ્યું કે આ બધી સિદ્ધિઓ દેશની નવી વિચારસરણી, નવીનતા અને યુવા શક્તિનું પ્રતીક છે.

પ્રધાનમંત્રીએ રાષ્ટ્રીય સિદ્ધિઓની ચર્ચા કરતાં કહ્યું કે ભારતે 357 મિલિયન ટન ખાદ્ય અનાજ ઉત્પાદન સાથે નવો ઐતિહાસિક રેકોર્ડ બનાવ્યો છે, જે દસ વર્ષ પહેલાંની સરખામણીમાં 100 મિલિયન ટનનો વધારો દર્શાવે છે. આ સિવાય, તેમણે અવકાશ ક્ષેત્રે યુવાઓના યોગદાનને પણ બિરદાવ્યું. તેમણે ISRO દ્વારા આયોજિત એક અનોખી ડ્રોન સ્પર્ધાનો વીડિયો જોયો હોવાનું જણાવ્યું, જેમાં પુણેની યુવાનોની ટીમે મંગળ ગ્રહ જેવી પરિસ્થિતિઓમાં ડ્રોન ઉડાડવાનો પ્રયાસ કર્યો હતો. ટીમના અનેક નિષ્ફળ પ્રયાસો છતાં, અંતે તેમનું ડ્રોન થોડા સમય માટે ઉડાન ભરવામાં સફળ રહ્યું, જે ભારતના 'જનરલ-ઝેડ' ની હાર ન માનવાની ભાવનાનું ઉત્તમ ઉદાહરણ છે.

આ એપિસોડમાં PM મોદીએ મધમાખી ઉછેર અને મધ ઉત્પાદન ક્ષેત્રે થઈ રહેલા પ્રશંસનીય કાર્યોની ચર્ચા પર વિશેષ ધ્યાન આપ્યું હતું. તેમણે જમ્મુ અને કાશ્મીરના પહાડી વિસ્તારોમાં જંગલી તુલસીના ફૂલોમાંથી ઉત્પન્ન થતા GI ટેગ પ્રાપ્ત 'રામબન સુલાઈ મધ'ની વિશેષતા પર પ્રકાશ પાડ્યો. આ ઉપરાંત, તેમણે કર્ણાટકના દક્ષિણ કન્નડ જિલ્લામાં 'ગ્રામજન્ય' જેવા ખેડૂત સંગઠનો અને તુમકુર જિલ્લામાં 'શિવગંગા કલાંજિયા' સંસ્થાના પ્રયાસોને પણ બિરદાવ્યા, જે ખેડૂતોને મધમાખીના બોક્સ પૂરા પાડીને આ કુદરતી વ્યવસાયને પ્રોત્સાહન આપી રહ્યા છે.

અંતે, PM મોદીએ નાગાલેન્ડના ચોકલાંગન ગામમાં ખિયામની-યાંગન આદિજાતિની એક અનોખી પ્રથા વિશે જણાવ્યું. અહીંના લોકો ઊંચા ખડકો પર માળા બનાવતી મધમાખીઓ સાથે નરમાશથી વાત કરે છે અને મધ એકત્ર કરતાં પહેલાં તેમની પરવાનગી માંગે છે, જે પ્રકૃતિ અને પરંપરા પ્રત્યેના આદરને દર્શાવે છે. આ 'મન કી બાત' કાર્યક્રમ દેશના યુવાનોની નવીનતા, ખેડૂતોની મહેનત અને ભારતીય રમતગમતની સિદ્ધિઓની ઉજવણી કરવા માટેનું એક મહત્ત્વપૂર્ણ માધ્યમ સાબિત થયો છે.