નવી દિલ્હી : ભારત સરકારના ટેલિકોમ્યુનિકેશન વિભાગ (DoT) એ WhatsApp સહિત તમામ મેસેજિંગ એપ્સના ઉપયોગને લઈને એક મોટો અને ક્રાંતિકારી નિયમ લાગુ કર્યો છે, જેની સીધી અસર દેશ-વિદેશમાં રહેતા કરોડો ભારતીયો પર પડશે. DoT ના આ નવા નિયમ બાદ હવે મેસેજિંગ પ્લેટફોર્મ્સ માટે એ ફરજિયાત બની જશે કે, યુઝર્સના ફોનમાંથી સિમ કાર્ડ દૂર થતાંની સાથે જ એકાઉન્ટની ચેટ અને કોલિંગ સેવાઓ બંધ કરી દેવામાં આવે (લોગઆઉટ). આ નિયમ ખાસ કરીને દુબઈ, કતાર અને કેનેડા જેવા દેશોમાં રહેતા વિદેશી ભારતીયો (NRIs) અને પ્રવાસીઓ માટે ચિંતાનો વિષય બન્યો છે.

નવા સરકારી નિયમો હેઠળ, મેસેજિંગ એપ્લિકેશનો હવે ફક્ત એવા ડિવાઇસ પર જ ચાલી શકશે જેની પાસે સક્રિય (Active) સિમ કાર્ડ છે. ભારત સરકારે યુઝર્સની સુરક્ષા વધારવા અને ફ્રોડ તેમજ સિમ-સ્વેપિંગ જેવા ગુનાઓ પર અંકુશ લગાવવા માટે આ નિયમ રજૂ કર્યો છે. તમામ એપ્લિકેશનોને 90 દિવસની અંદર ખાતરી કરવી પડશે કે વપરાશકર્તાનું સિમ કાર્ડ તેમની સેવા સાથે સતત જોડાયેલ રહે. વિદેશમાં રહેતા લોકો સામાન્ય રીતે પોતાના ભારતીય સિમ કાર્ડને અનધિકૃત રીતે ઍક્સેસ કરતા હોવાથી, હવે તેમને મુશ્કેલીઓનો સામનો કરવો પડી શકે છે.

આ નિયમની બીજી મોટી અસર કમ્પ્યુટર પર WhatsApp વેબ અથવા અન્ય મેસેજિંગ વેબનો ઉપયોગ કરનારાઓ પર પણ પડશે. નવા નિયમમાં જણાવાયું છે કે, આ યુઝર્સે હવે દર 6 કલાકે ફરીથી પ્રમાણિત કરવું પડશે અથવા ફરીથી લોગિન કરવું પડશે. આ ફરજિયાત રી-ઓથેન્ટિકેશન મીડિયા અને અન્ય સંસ્થાઓમાં કામ કરતા લોકો પર અસર કરશે જેઓ લાંબા સમય સુધી તેમના ડેસ્કટોપ પર WhatsApp વેબનો ઉપયોગ કરતા હોય છે. આ ઉપરાંત, નબળા નેટવર્ક કનેક્ટિવિટીવાળા વિસ્તારોમાં રહેતા લોકોને પણ વારંવાર લોગઆઉટ થવાની સમસ્યાનો સામનો કરવો પડી શકે છે.

ભારત સરકારે યુઝર્સની સુરક્ષા માટે આ પગલું લીધું હોવા છતાં, વિદેશમાં રહેતા ભારતીયો માટે આ નિયમ બેવડો પડકાર લાવશે. તેમને હવે ભારતમાં તેમનું સિમ કાર્ડ સક્રિય રાખવા માટે નવી વ્યવસ્થાઓ કરવી પડશે. સરકારે આશા વ્યક્ત કરી છે કે, આ નિયમથી મેસેજિંગ પ્લેટફોર્મ્સ પરની સુરક્ષામાં વધારો થશે અને યુઝર્સની ઓળખની ચોરી થતી અટકાવી શકાશે.