મધ્ય ઇંગ્લેન્ડના વુર્સ્ટર શહેરમાં હરિયાણાના ૩૦ વર્ષીય વિદ્યાર્થી વિજય કુમાર શ્યોરાણની રસ્તા પર છરીના ઘા ઝીંકીને ઘાતકી હત્યા કરવામાં આવી છે. આ ઘટનામાં સ્થાનિક પોલીસે ૫ શંકાસ્પદ લોકોની અટકાયત કરી હતી, પરંતુ તેઓને હાલ જામીન પર મુક્ત કરી દેવામાં આવતા પરિવારજનોમાં ભારે રોષ અને ચિંતા વ્યાપી ગઈ છે. મૃતકના ભાઈએ ભારતના વિદેશ મંત્રી એસ. જયશંકરને પત્ર લખીને મૃતદેહને ભારત પરત લાવવા માટે તાત્કાલિક મદદની ગુહાર લગાવી છે.

ઘટનાની વિગત અને પોલીસ કાર્યવાહી
વેસ્ટ મર્સિયા પોલીસ અને મીડિયા રિપોર્ટ્સ અનુસાર, આ હચમચાવી દેનારી ઘટના ૨૫ નવેમ્બરના રોજ બની હતી. વુર્સ્ટરના બાર્બોર્ન રોડ પર વિજય કુમાર ગંભીર રીતે ઘાયલ અવસ્થામાં મળી આવ્યા હતા. તેમને તાત્કાલિક હોસ્પિટલમાં ખસેડવામાં આવ્યા હતા, પરંતુ સારવાર દરમિયાન તેમનું મૃત્યુ થયું હતું. પોલીસે આ મામલે હત્યાની શંકાના આધારે ૨૨ થી ૩૫ વર્ષની વયના પાંચ પુરુષોની ધરપકડ કરી હતી. જોકે, તપાસ ચાલુ હોવાથી હાલમાં આ તમામ શંકાસ્પદોને જામીન પર છોડી મૂકવામાં આવ્યા છે, જ્યારે અન્ય એક વ્યક્તિને કોઈ પણ કાર્યવાહી વગર મુક્ત કરવામાં આવ્યો છે.

સરકારી નોકરી છોડીને ઉચ્ચ અભ્યાસ માટે યુકે ગયા હતા: મૃતક વિજય કુમાર શ્યોરાણ મૂળ હરિયાણાના ચરખી દાદરી જિલ્લાના જગરામબાસ ગામના વતની હતા. તેઓ અગાઉ ભારતમાં સેન્ટ્રલ બોર્ડ ઓફ એક્સાઇઝ એન્ડ કસ્ટમ્સમાં ઇન્સ્પેક્ટર તરીકે સરકારી નોકરી કરતા હતા. જોકે, ઉચ્ચ અભ્યાસનું સપનું પૂરું કરવા માટે તેમણે આ વર્ષે જ પોતાની નોકરી છોડી દીધી હતી અને બ્રિસ્ટલની યુનિવર્સિટી ઓફ વેસ્ટ ઓફ ઇંગ્લેન્ડ (UWE) માં અભ્યાસ માટે યુકે ગયા હતા.

પરિવારનો આક્ષેપ અને સરકાર પાસે મદદની માંગ: મૃતકના ભાઈ રવિ કુમારે વિદેશ મંત્રીને લખેલા પત્રમાં આશંકા વ્યક્ત કરી છે કે આ હત્યામાં યુકેમાં રહેતા હરિયાણા અને પંજાબના જ કેટલાક શંકાસ્પદ તત્વોનો હાથ હોઈ શકે છે, જોકે બ્રિટિશ પોલીસ દ્વારા આ અંગે કોઈ સત્તાવાર પુષ્ટિ કરવામાં આવી નથી.

સ્થાનિક ધારાસભ્ય સુનીલ સતપાલ સાંગવાને પણ આ ઘટના અંગે દુઃખ વ્યક્ત કરતા સોશિયલ મીડિયા પર પોસ્ટ કરી છે અને ભારત સરકારને વિનંતી કરી છે કે જટિલ કાયદાકીય પ્રક્રિયામાં પરિવારને મદદ કરી મૃતદેહને સત્વરે વતન લાવવાની વ્યવસ્થા કરવામાં આવે. હાલમાં પોલીસ દ્વારા સાક્ષીઓને આગળ આવવા અને માહિતી આપવા માટે અપીલ કરવામાં આવી છે.