કોલકાતા: પશ્ચિમ બંગાળમાં આગામી વર્ષે યોજાનારી વિધાનસભા ચૂંટણી પહેલાં ચાલી રહેલી સ્પેશિયલ ઇન્ટેન્સિવ રિવિઝન SIR પ્રક્રિયાએ ગંભીર રાજકીય અને માનવીય સંકટ ઊભું કર્યું છે. મુખ્યમંત્રી મમતા બેનર્જીએ મંગળવારે દાવો કર્યો હતો કે SIR પ્રક્રિયાના 'ડર અને તણાવ' ને કારણે રાજ્યમાં અત્યાર સુધીમાં ૩૯ લોકોના મોત થયા છે.

મુખ્યમંત્રી મમતા બેનર્જીએ જણાવ્યું હતું કે ૪ નવેમ્બરથી શરૂ થયેલા આ અભિયાને સામાન્ય લોકોમાં અનિશ્ચિતતા અને ભયનું વાતાવરણ ઊભું કર્યું છે, જેના કારણે ઘણા લોકો ગભરાઈ ગયા હતા અને માનસિક રીતે તણાવમાં આવી ગયા હતા. સરકારે કરેલા મૂલ્યાંકન મુજબ, ૩૯ મૃત્યુમાં આત્મહત્યાના કેસનો પણ સમાવેશ થાય છે. મમતા બેનર્જીએ આ મૃતકોના પરિવારોને સરકાર તરફથી ₹૨ લાખની નાણાકીય સહાય પૂરી પાડવાની જાહેરાત કરી છે.

આ મૃતકોમાં ચાર બૂથ લેવલ ઓફિસરનો પણ સમાવેશ થાય છે, જેઓ આ પ્રક્રિયામાં ફરજ પર હતા. મમતા બેનર્જીએ ઉમેર્યું હતું કે ત્રણ BLO સહિત અન્ય ૧૩ લોકો ફરજ પર હતા ત્યારે અચાનક પડી ગયા હતા અથવા ગંભીર રીતે બીમાર પડી ગયા હતા. આ ૧૩ પરિવારોને પણ સરકાર તરફથી ₹૧ લાખની સહાય મળશે. સરકારી અહેવાલો મુજબ, BLO પર કામનું દબાણ પણ એક મુખ્ય મુદ્દો બનીને ઊભરી આવ્યું છે.

મુખ્યમંત્રીએ નબન્નામાં રાજ્ય સરકારના વિકાસ કાર્યોની સમીક્ષા કર્યા પછી ભારપૂર્વક જણાવ્યું હતું કે જાહેર સલામતી સરકારની પ્રાથમિકતા છે અને SIR સંબંધિત દરેક કેસ પર નજર રાખવામાં આવી રહી છે. પશ્ચિમ બંગાળ સરકારે કેન્દ્ર સરકાર અને ECI પર SIR ના મુદ્દે ગંભીર આરોપો લગાવ્યા છે, જેને પગલે આ પ્રક્રિયા રાજ્યમાં રાજકીય રીતે સંવેદનશીલ બની ગઈ છે.