દિલ્હીમાં ડિનરથી મેગા ડીલ્સ સુધીઃ યુટનનો કાર્યક્રમ જાહેર થયો
રાષ્ટ્રપતિ પુતિન ૪ ડિસેમ્બરની સાંજે નવી દિલ્હી પહોંચશેઃ સાંજે, વડા પ્રધાન મોદી તેમના સન્માનમાં ૭ લોક કલ્યાણ માર્ગ ખાતે રાત્રે ૭ વાગ્યાની આસપાસ એક ખાનગી રાત્રિભોજનનું આયોજન કરશે : ૫ ડિસેમ્બરની સવારે ૯ વાગ્યે, રાષ્ટ્રપતિ ભવનના પ્રાંગણમાં રાષ્ટ્રપતિ પુતિનનું ભવ્ય ઔપચારિક સ્વાગત કરવામાં આવશે અને તેમને ત્રિ-સેવા ગાર્ડ ઓફ ઓનર અર્પણ કરાશે. ત્યાર બાદ, સવારે ૧૦ વાગ્યે પુતિનજી રાજઘાટ પહોંચીને રાષ્ટ્રપિતા મહાત્મા ગાંધીને શ્રદ્ધાંજાલિ અર્પણ કરશે
નવી દિલ્હી,તા.૦૩: ભારત અને રશિયા વચ્ચેની સુલ્લઢ વ્યૂહાત્મક ભાગીદારીના ૨૫ વર્ષની નોંધપાત્ર સિદ્ધિના પ્રસંગે, રશિયાના રાષ્ટ્રપતિ વ્લાદિમીર પુતિન આગામી ૪-૫ ડિસેમ્બરના રોજ ભારતની સત્તાવાર મુલાકાતે આવી રહ્યા છે. યુક્રેન પર રશિયાની વિશેષ સૈન્ય કાર્યવાહી શરૂ થયા બાદ આ તેમની પ્રથમ ભારત યાત્રા છે. બંને દેશો વચ્ચે આ ૨૩મું દ્વિપક્ષીય શિખર સંમેલન યોજાઈ રહ્યું છે, જેને બંને પક્ષો દ્વારા અત્યંત મહત્વપૂર્ણ માનવામાં આવે છે. આ મુલાકાત એવા સમયે થઈ રહી છે જ્યારે વૈશ્વિક ભૂ-રાજકીય પરિદ્રશ્યમાં અનેક પરિવર્તન આવી રહ્યા છે, અને ભારત-રશિયા સંબંધો સમયની કસોટી પર ખરા ઉતર્યા છે. આ શિખર સંમેલન દ્વિપક્ષીય સંબંધોને નવી દિશા આપવા માટેનું એક મુખ્ય પ્લેટફોર્મ બનશે.
રાષ્ટ્રપતિ પુતિન ૪ ડિસેમ્બરની સાંજે નવી દિલ્હી પહોંચશે. તે જ સાંજે, વડા પ્રધાન નરેન્દ્ર મોદી તેમના સન્માનમાં ૭ લોક કલ્યાણ માર્ગ ખાતે રાત્રે ૭ વાગ્યાની આસપાસ એક ખાનગી રાત્રિભોજનનું આયોજન કરશે. બીજા દિવસે, ૫ ડિસેમ્બરની સવારે ૯ વાગ્યે, રાષ્ટ્રપતિ ભવનના પ્રાંગણમાં રાષ્ટ્રપતિ પુતિનનું ભવ્ય ઔપચારિક સ્વાગત કરવામાં આવશે અને તેમને ત્રિ-સેવા ગાર્ડ ઓફ ઓનર અર્પણ કરાશે. ત્યાર બાદ, સવારે ૧૦ વાગ્યે પુતિનજી રાજઘાટ પહોંચીને રાષ્ટ્રપિતા મહાત્મા ગાંધીને શ્રદ્ધાંજાલિ અર્પણ કરશે.
સૌથી મહત્વપૂર્ણ કાર્યક્રમ સવારે ૧૧ વાગ્યે હૈદરાબાદ હાઉસમાં યોજાશે, જ્યાં વડા પ્રધાન મોદી અને રાષ્ટ્રપતિ પુતિન ૨૩મી ભારત-રશિયા શિખર બેઠક કરશે. આ બેઠક પર વિશ્વની નજર ટકેલી છે. એવું માનવામાં આવે છે કે આ દરમિયાન રક્ષા, ઊર્જા, વેપાર, અદ્યતન ટેકનોલોજી, અવકાશ અને વ્યૂહાત્મક સહયોગ જેવા અનેક મુખ્ય ક્ષેત્રોમાં મહત્વપૂર્ણ ઘોષણાઓ અને સમજૂતીઓ થઈ શકે છે. બેઠક પૂર્ણ થયા બાદ, બંને નેતાઓ દ્વિપક્ષીય સંબંધોની પ્રગતિ દર્શાવતું સંયુક્ત નિવેદન પણ બહાર પાડશે.
બપોર પછીનો કાર્યક્રમ વેપારને કેન્દ્રમાં રાખીને તૈયાર કરાયો છે. સાંજે ૪ વાગ્યે બંને નેતાઓ ભારત-રશિયા બિઝનેસ ફોરમને સંબોધિત કરશે. આ મંચ પર દ્વિપક્ષીય વેપારને નવી અને મજબૂત દિશા આપવા પર વિશેષ ધ્યાન કેન્દ્રિત કરવામાં આવશે. આ તબક્કો એટલા માટે ખાસ છે કારણ કે છેલ્લા કેટલાક વર્ષોમાં ભારત અને રશિયા વચ્ચેના વેપાર સંબંધોમાં રેકોર્ડ વૃદ્ધિ નોંધાઈ છે, જે આર્થિક ભાગીદારીની વધતી જતી તાકાત દર્શાવે છે.
૫ ડિસેમ્બરની સાંજે ૭ વાગ્યે, ભારતના રાષ્ટ્રપતિ દ્રૌપદી મુર્મૂ દ્વારા રાષ્ટ્રપતિ પુતિનના સન્માનમાં એક ભવ્ય રાજ્ય ભોજનું આયોજન કરવામાં આવશે. લગભગ ૩૦ કલાકના આ ટૂંકા પરંતુ અત્યંત વ્યસ્ત અને ફળદાયી ભારત પ્રવાસ બાદ, રાષ્ટ્રપતિ વ્લાદિમીર પુતિન મોડી સાંજે ભારતથી રશિયા પરત ફરશે. આ મુલાકાત ભારત-રશિયા મિત્રતાના નવા અધ્યાયની શરૂઆત કરશે.
(10:07 AM IST)
છેલ્લા 8 દિવસમાં સૌથી લોકપ્રિય 
