અમદાવાદ: કેન્દ્રીય ગૃહ અને સહકાર પ્રધાન અમિત શાહના હસ્તે અમદાવાદના જાણીતા વસ્ત્રાપુર તળાવનું લોકાર્પણ કરવામાં આવ્યું છે. તળાવના રિનોવેશન પ્રોજેક્ટમાં રૂ. 10 કરોડનો ખર્ચ કરવામાં આવ્યો છે, અને તેને હેરિટેજ થીમ પર આકર્ષક રીતે નવજીવન આપવામાં આવ્યું છે. રિનોવેશન બાદ હવે આ તળાવને ગુજરાતના આદિ કવિ 'નરસિંહ મહેતા સરોવર' નામ આપવામાં આવ્યું છે. તળાવમાં આવતા પાણીને શુદ્ધ કરવા માટે બાયોરેમેડિઝ પ્લાન્ટ પણ શરૂ કરવામાં આવ્યો છે, જે દૂષિત પાણીને ટ્રીટ કરીને સ્વચ્છ બનાવશે, જેથી તળાવનું સૌંદર્ય અને પર્યાવરણીય સંતુલન જળવાઈ રહે.
અમદાવાદના નાગરિકો માટે આ તળાવ 1 જાન્યુઆરી થી ખુલ્લું મૂકવામાં આવશે. વહીવટી તંત્ર દ્વારા તળાવની એન્ટ્રી ફી રૂ. 10 નક્કી કરવામાં આવી છે, જે તેના સંચાલન અને જાળવણી માટે ઉપયોગમાં લેવાશે. વસ્ત્રાપુર તળાવનું નવીનીકરણ શહેરના લોકોને એક આકર્ષક અને શાંત મનોરંજન સ્થળ પૂરું પાડશે. અમિત શાહે આ પ્રસંગે જણાવ્યું હતું કે, આ વિકાસકાર્યો અમદાવાદને એક આધુનિક હેરિટેજ શહેર તરીકે મજબૂત બનાવશે.
તળાવના લોકાર્પણની સાથે જ કેન્દ્રીય મંત્રી અમિત શાહે થલતેજ વોર્ડમાં પ્રધાનમંત્રી આવાસ યોજના (PM Awas Yojana) હેઠળ તૈયાર થયેલા આવાસનું પણ લોકાર્પણ કર્યું હતું. તેમણે માહિતી આપી કે આ યોજના હેઠળ 861 પરિવારજનોને ઘરનું ઘર મળ્યું છે. આ પ્રોજેક્ટની ગુણવત્તા પર ભાર મૂકતા અમિત શાહે જણાવ્યું હતું કે, "બાંધકામનો જેટલો ખર્ચો છે એટલો જમીનનો ખર્ચો છે. આજુબાજુમાં જે બંગલા છે એ 20 કરોડની આસપાસના છે," જે દર્શાવે છે કે લાભાર્થીઓને ખૂબ જ કિંમતી વિસ્તારમાં ઘર મળ્યા છે.
અમિત શાહે નવા ઘર મેળવનારા પરિવારોને શુભેચ્છાઓ પાઠવતા કહ્યું હતું કે, આ આવાસ યોજનામાં તમામ પ્રકારની સુવિધાઓ આપવામાં આવી છે, જેમ કે આરોગ્ય અને શિક્ષણની વ્યવસ્થા. તેમણે આશા વ્યક્ત કરી હતી કે, "આવનારી પેઢી સારું શિક્ષણ મેળવે એવી પણ વ્યવસ્થા કરવામાં આવી છે." આ ડબલ લોકાર્પણ કાર્યક્રમ અમદાવાદના શહેરી વિકાસ અને નાગરિકોના જીવનધોરણને સુધારવાના સરકારના પ્રયાસોને દર્શાવે છે.