ઓકિનાવા/ટોક્યો: પૂર્વીય ચીન સમુદ્રમાં જાપાનના ઓકિનાવા નજીક જાપાન અને ચીન વચ્ચે એક અત્યંત તણાવપૂર્ણ ઘટના સામે આવી છે, જેના કારણે બંને દેશો વચ્ચે મુકાબલો શરૂ થયો છે. ચીની એરક્રાફ્ટ કેરિયર 'લિયાઓનિંગ' પરથી ઉડાન ભરતા J-15 લશ્કરી વિમાને શનિવારે જાપાની F-15 ફાઇટર જેટ પર બે વાર રડાર લોક (Missile Lock) મેળવ્યો હતો. રડાર લોકનો અર્થ થાય છે કે ચીની વિમાને જાપાની જેટ પર તેની ચોક્કસ સ્થિતિ, ગતિ અને દિશાનું સતત નિરીક્ષણ કરવા માટે તેના રડારને કેન્દ્રિત કર્યું હતું, જે હુમલો કરવાની તૈયારી દર્શાવે છે.
જાપાનના સંરક્ષણ મંત્રાલયે આ ઘટનાની પુષ્ટિ કરી હતી અને જણાવ્યું હતું કે, આ કાર્યવાહી એક વખત બપોરે લગભગ ત્રણ મિનિટ માટે અને ફરીથી સાંજે લગભગ ૩૦ મિનિટ માટે થઈ હતી. આ ઘટના ચીની એરસ્પેસના સંભવિત ઉલ્લંઘનનો જવાબ આપવા માટે થઈ હતી, પરંતુ જાપાને ભારપૂર્વક જણાવ્યું હતું કે જાપાની એરસ્પેસનું કોઈ ઉલ્લંઘન થયું નથી અને કોઈ જાનહાનિ થઈ નથી. રવિવારે સવારે, જાપાનના સંરક્ષણ પ્રધાન શિંજીરો કોઈઝુમીએ ચીન સમક્ષ સખત વિરોધ નોંધાવ્યો હતો, તેને "ખતરનાક કૃત્ય" ગણાવ્યું હતું જે સુરક્ષિત વિમાન સંચાલનના નિયમોનું ઉલ્લંઘન કરે છે. તેમણે આવી ઘટનાઓને રોકવા માટે કડક પગલાં લેવાની માંગ કરી છે.
બીજી તરફ, ચીને જાપાનના આરોપોને ફગાવી દીધા છે અને કહ્યું છે કે તે ફક્ત નિયમિત દાવપેચ ચલાવી રહ્યું હતું. ચીનના સરકારી મીડિયાએ તો એવો પણ દાવો કર્યો હતો કે ચીને દાવપેચ વિશે અગાઉથી જાણ કરી હોવા છતાં જાપાને હસ્તક્ષેપ કર્યો હતો. ચીને ઉલટાનું જાપાન પાસે તાત્કાલિક ફ્રન્ટલાઈન પર તેની પ્રવૃત્તિઓ બંધ કરવાની માંગ કરી છે, અથવા આંતરરાષ્ટ્રીય કાયદા અનુસાર કાર્યવાહીનો સામનો કરવા તૈયાર રહેવા જણાવ્યું છે. આ સામ-સામા આક્ષેપો અને ખતરનાક મુકાબલાથી એશિયા-પેસિફિક ક્ષેત્રમાં સૈન્ય તણાવ વધ્યો છે.