અયોધ્યા : ઉત્તર પ્રદેશના અયોધ્યા જિલ્લાના પુરા કલંદર પોલીસ સ્ટેશન વિસ્તારના એક ગામમાં શનિવારે મોડી રાત્રે એક સનસનીખેજ ઘટના બની છે. અહીં એક ૩૦ વર્ષીય પરણિત મહિલા, જે બે બાળકોની માતા છે, તે તેના પ્રેમી સાથે ઘરમાં રંગે હાથે પકડાઈ હતી. મહિલાનો પતિ કામ અર્થે દુબઈમાં રહે છે, જ્યારે તેના સસરા નાગપુર ગયા હતા. મહિલા તેની સાસુ અને બાળકો સાથે ઘરે હતી. દરમિયાન, મધ્યરાત્રિએ પુત્રવધૂના રૂમમાંથી આવતા અવાજો અને વિચિત્ર ફફડાટથી સાસુ ચોંકી ગઈ હતી. તેમણે દરવાજો ખખડાવ્યો અને પાડોશીઓને ભેગા કર્યા હતા.
જ્યારે લોકો રૂમમાં પહોંચ્યા અને તપાસ શરૂ કરી, ત્યારે બધા આશ્ચર્યચકિત થઈ ગયા: મહિલાનો ૨૫ વર્ષીય પ્રેમી પલંગ નીચે છુપાયેલો મળી આવ્યો! આ જોઈને પુત્રવધૂ શરમથી ડૂબી ગઈ. ગામલોકોએ યુવાનને પકડી લીધો અને પોલીસને જાણ કરી. આ સમગ્ર ઘટનાની જાણકારી જ્યારે દુબઈમાં રહેતા તેના પતિને આપવામાં આવી, ત્યારે તેણે વધુ વિલંબ કર્યા વિના, ફોન પર જ તેની પત્નીને છૂટાછેડા આપી દીધા અને સ્પષ્ટ કર્યું કે તે હવે તેના પ્રેમી સાથે રહેવા માટે સ્વતંત્ર છે.
સવારે, ગ્રામજનોએ આ મામલે પંચાયત બોલાવી અને નિર્ણય લીધો કે જો દંપતી સાથે રહેવા માંગતા હોય, તો તેઓએ લગ્ન કરવા પડશે. મહિલા તેના પ્રેમી સાથે રહેવા અને તેની સાથે લગ્ન કરવા માટે સંમત થઈ. પુરા કલંદર પોલીસ સ્ટેશનના કાર્યકારી ઇન્ચાર્જ કમલેશ સાહનીએ જણાવ્યું હતું કે આ મામલો તેમના ધ્યાનમાં આવ્યો હતો, પરંતુ બંને પક્ષો પરસ્પર લગ્ન માટે સંમત થયા હોવાથી, કોઈ ફરિયાદ નોંધવામાં આવી નથી. આ ઘટનાથી ગામમાં ચકચાર મચી જવા પામી છે.