ઓરડિયા : યુરોપના રોમાનિયામાંથી એક અત્યંત ચોંકાવનારો અને ભયાનક કાર અકસ્માતનો વિડીયો સામે આવ્યો છે. અહીં ઓરડિયા શહેરના ઉત્તરપશ્ચિમ વિસ્તારમાં 3 ડિસેમ્બરના રોજ એક ૫૫ વર્ષીય વ્યક્તિએ પોતાની મર્સિડીઝ કારને હવામાં ઉડાવી દીધી હતી. ઝડપી ગતિએ આવી રહેલી મર્સિડીઝ ગોળચક્કર સાથે અથડાઈ, ફૂટપાથ સાથે ટકરાઈ અને ટ્રાફિકની ઉપર હવામાં ઉછળી હતી. CCTV ફૂટેજમાં જોઈ શકાય છે કે કાર હવામાં ઉડતી વખતે નીચે ઊભેલી બે કારની ઉપરથી પસાર થઈ હતી, જેના કારણે એક મોટો અકસ્માત ટળી ગયો હતો.

સૂત્રો અને અધિકારીઓના જણાવ્યા અનુસાર, ડ્રાઇવર ડાયાબિટીસનો દર્દી છે અને લોહીમાં ગ્લુકોઝની માત્રા ખૂબ ઓછી થઈ જવાને કારણે તે ડ્રાઇવિંગ કરતી વખતે બેભાન થઈ ગયો હતો. જેના કારણે તેણે કાર પરનો કાબૂ ગુમાવ્યો. મર્સિડીઝ ખોટી દિશામાં ગોળચક્કરમાં પ્રવેશી હતી, મધ્ય ટાપુ પર અથડાઈને હવામાં કૂદી પડી હતી અને પેટ્રોલ પંપથી થોડા યાર્ડ દૂર રસ્તાની બાજુના થાંભલા સાથે અથડાઈને નીચે પડી હતી. આટલા ભયાનક અકસ્માત છતાં, ડ્રાઇવરને માત્ર નાની ઇજાઓ થઈ હતી. જોકે, આઘાતજનક રીતે, તેને હોસ્પિટલમાં લઈ જવામાં આવ્યો હોવા છતાં તેણે સારવારનો ઇનકાર કર્યો અને ઘરે ગયો હતો.

સદનસીબે, આ અકસ્માતમાં રસ્તા પર ઊભેલી અન્ય બે કારના મુસાફરો કે અન્ય કોઈ રાહદારીને ઈજા થઈ ન હતી, જે એક ચમત્કારથી ઓછું નથી. આ ઘટનાથી રોમાનિયાના શહેરી વિસ્તારોમાં ડાયાબિટીસના દર્દીઓ દ્વારા ડ્રાઇવિંગ અને તેના સંભવિત જોખમો વિશે ચર્ચા શરૂ થઈ છે. પોલીસે આ મામલે તપાસ શરૂ કરી છે.