બૈજીંગ : ચીનની અર્થવ્યવસ્થા માટે નવેમ્બર મહિનો મિશ્ર પરિણામો લાવ્યો છે. ચીનના કસ્ટમ ડેટા અનુસાર, નવેમ્બરમાં ચીનની કુલ નિકાસમાં ૫.૯% નો વધારો નોંધાયો છે, જે અર્થશાસ્ત્રીઓના ૩.૮% ના અંદાજ કરતાં ઘણો સારો છે અને ઓક્ટોબરમાં ૧.૧% ના ઘટાડામાંથી મજબૂત સુધારો દર્શાવે છે. આ વૃદ્ધિ મુખ્યત્વે વૈશ્વિક બજારોમાં માંગમાં વધારો થવાને કારણે તેમજ આસિયાન અને યુરોપિયન યુનિયન (EU) જેવા અન્ય દેશોમાં શિપમેન્ટમાં થયેલા તીવ્ર વધારાને કારણે જોવા મળી છે.
યુએસમાં તીવ્ર ઘટાડો: જોકે, યુએસ-ચીન વચ્ચેના વેપાર સંબંધો હજી પણ દબાણ હેઠળ છે. નવેમ્બરમાં ચીનની યુએસમાં માલની નિકાસમાં ૨૮.૬% નો ઘટાડો થયો છે, જે સતત આઠમા મહિને બે આંકડાનો ઘટાડો છે. આ વર્ષે અત્યાર સુધીમાં, યુએસમાં ચીનની નિકાસમાં ૧૮.૯% નો અને આયાતમાં ૧૩.૨% નો ઘટાડો નોંધાયો છે, જે ટ્રમ્પ-શ્રી જિનપિંગ વચ્ચેના વેપાર સોદા છતાં મંદી ચાલુ હોવાનું સૂચવે છે.
આયાતમાં ઘટાડો, વેપાર સરપ્લસમાં વધારો
બીજી તરફ, નવેમ્બરમાં ચીનની આયાતમાં અપેક્ષિત ૩% કરતાં ઓછો માત્ર ૧.૯% નો વધારો થયો છે. નિષ્ણાતો માને છે કે ચીનમાં નબળી સ્થાનિક માંગ, રિયલ એસ્ટેટ કટોકટી અને રોજગાર અનિશ્ચિતતા આયાતને નકારાત્મક અસર કરી રહી છે.
જાન્યુઆરીથી નવેમ્બર ૨૦૨૫ દરમિયાન ચીનની કુલ નિકાસ ૫.૪% વધી છે, જ્યારે આયાત માત્ર ૦.૬% ઘટી છે, જેના પરિણામે ચીનનો વેપાર સરપ્લસ ૨૧.૬% વધીને $૧.૦૭૬ ટ્રિલિયન થયો છે.
આગામી નીતિ સંકેતો
વિશ્લેષકો હવે આગામી વાર્ષિક સેન્ટ્રલ ઇકોનોમિક વર્ક કોન્ફરન્સ પર નજર રાખી રહ્યા છે, જ્યાં ૨૦૨૬ માટેની આર્થિક નીતિઓ અને વૃદ્ધિ લક્ષ્યો પર ચર્ચા કરવામાં આવશે. નિષ્ણાતોનો અંદાજ છે કે ચીન તેનું ૨૦૨૬ નું GDP લક્ષ્ય "લગભગ ૫%" જાળવી રાખશે અને અર્થતંત્રને ટેકો આપવા માટે દરમાં ઘટાડો અને મોટા ઉત્તેજના પેકેજો રજૂ કરી શકે છે.