પણજી :  ગોવાના રોમિયો લેનમાં આવેલી 'બિર્ચ બાય રોમિયો લેન' નાઈટક્લબમાં સિલિન્ડર બ્લાસ્ટને કારણે લાગેલી ભીષણ આગના મુખ્ય આરોપી માલિકો સૌરભ અને ગૌરવ લુથરા ઘટનાના પાંચ કલાકની અંદર જ દેશમાંથી ભાગી ગયા હોવાનું બહાર આવ્યું છે. ગોવા પોલીસે સત્તાવાર નિવેદન જારી કરીને જણાવ્યું છે કે ૭ ડિસેમ્બરના રોજ સવારે ૫:૩૦ વાગ્યે, બંને આરોપીઓ મુંબઈથી ઇન્ડિગો ફ્લાઇટ 6E 1073 માં બેસીને થાઇલેન્ડના ફુકેટ જવા રવાના થયા હતા, જ્યારે અકસ્માત આગલી રાત્રે મધ્યરાત્રિની આસપાસ થયો હતો.

આ ખુલાસો સ્પષ્ટપણે દર્શાવે છે કે આરોપીઓએ કાયદાકીય કાર્યવાહીથી બચવા માટે તાત્કાલિક ભાગી જવાની યોજના બનાવી હતી. FIR દાખલ થયા પછી તરત જ, ગોવા પોલીસની એક ટીમ તેમની ધરપકડ કરવા માટે દિલ્હીમાં તેમના પરિસરમાં પહોંચી હતી, પરંતુ તેઓ ત્યાંથી ગાયબ હતા, જેના પગલે લુકઆઉટ સર્ક્યુલર (LOC) જારી કરવામાં આવ્યું હતું. જોકે, મુંબઈ ઇમિગ્રેશન દ્વારા પુષ્ટિ મળી કે બંને આરોપીઓ દેશ છોડી ચૂક્યા છે. આંતરરાષ્ટ્રીય સ્તરે કાર્યવાહી કરવા માટે, ગોવા પોલીસે તાત્કાલિક ધોરણે CBI ના ઇન્ટરપોલ વિભાગનો સંપર્ક સાધ્યો છે જેથી તેમની ઝડપી ધરપકડ અને પ્રત્યાર્પણ થઈ શકે.

દરમિયાન, પોલીસે આ કેસમાં સહ-આરોપી ભરત કોહલીને દિલ્હીથી અટકાયતમાં લીધા છે અને ટ્રાન્ઝિટ રિમાન્ડ મેળવીને તેમને વધુ પૂછપરછ માટે ગોવા લાવવામાં આવી રહ્યા છે. આ દુર્ઘટનામાં મૃત્યુ પામેલા તમામ લોકોના પોસ્ટમોર્ટમ પૂર્ણ થઈ ગયા છે અને મૃતદેહો તેમના પરિવારોને સોંપી દેવામાં આવ્યા છે. માલિકોનું દેશ છોડીને ભાગી જવું એ આ કેસમાં એક ગંભીર રાજકીય અને કાયદાકીય વળાંક છે, જેનાથી ભવિષ્યમાં આંતરરાષ્ટ્રીય કાયદાકીય સહયોગની જરૂરિયાત વધશે.