નવી દિલ્હી, તા. ૦૯ ડિસેમ્બર, ૨૦૨૫ : ઇન્ડિયન પ્રીમિયર લીગ (IPL) ૨૦૨૬ની હરાજી માટે ૧,૩૫૫ ખેલાડીઓએ રજિસ્ટ્રેશન કરાવ્યું હતું, પરંતુ હવે મોટા ભાગના ખેલાડીઓની સફર પૂર્ણ થઈ છે. BCCI દ્વારા તમામ ટીમોને આ યાદી આપવામાં આવી હતી, જેના આધારે ટીમોએ કેટલાક નામો પસંદ કર્યા હતા. હવે BCCI દ્વારા માત્ર ૩૫૦ ખેલાડીઓની ફાઇનલ યાદી તૈયાર કરવામાં આવી છે, જેઓ IPL ઓક્શનનો હિસ્સો બનશે. ૧,૦૦૫ ખેલાડીઓની બાદબાકી થઈ છે. જોકે, કેટલાક ખેલાડીઓએ રજિસ્ટર ન કર્યું હોવા છતાં BCCI એ તેમને ફાઇનલ લિસ્ટમાં સામેલ કર્યા છે.
ઓક્શનની તારીખ અને પ્રક્રિયા
IPL ૨૦૨૬ના ઓક્શનનું આયોજન ૧૬ ડિસેમ્બરે થવાનું છે. દુનિયાની આ સૌથી મોટી ક્રિકેટ લીગની હરાજી અબુ ધાબીમાં સ્થિત ઇતિહાદ એરેના ખાતે થશે. ભારતમાં આ હરાજીનું લાઇવ સ્ટ્રીમિંગ બપોરે ૨:૩૦ વાગ્યાથી સ્ટાર સ્પોર્ટ્સ નેટવર્ક પર શરૂ થશે.
હરાજી પ્રક્રિયા:
 * સૌપ્રથમ 'કેપ્ડ' (આંતરરાષ્ટ્રીય મેચ રમેલા) ખેલાડીઓ માટે બોલી લગાવવામાં આવશે.
 * ત્યારબાદ 'અનકેપ્ડ' ખેલાડીઓની હરાજી થશે.
 * ૭૧ થી ૩૫૦ નંબરના ખેલાડીઓ એક્સિલરેશન રાઉન્ડનો ભાગ બનશે.
ક્વિન્ટન ડી કોક અને નવા નામો
ક્રિકબઝના અહેવાલ મુજબ, BCCI એ ૩૫૦ પ્લેયર્સની યાદી બનાવી છે. દક્ષિણ આફ્રિકાના સ્ટાર ખેલાડી ક્વિન્ટન ડી કોકને પણ આ લિસ્ટમાં સ્થાન મળ્યું છે, કારણ કે એક ટીમે તેમનું નામ ઉમેરવાની ઈચ્છા વ્યક્ત કરી હતી. રસપ્રદ વાત એ છે કે, ગયા વર્ષે તેમની બેઝ પ્રાઇઝ ₹૨ કરોડ હતી, પરંતુ આ વખતે તેમણે ₹૧ કરોડની બેઝ પ્રાઇઝ સાથે આવવાનો નિર્ણય લીધો છે.
ફાઇનલ લિસ્ટમાં સામેલ કેટલાક નવા નામો આ પ્રમાણે છે:
 * વિદેશી ખેલાડીઓ: અરબ ગુલ, માઇલ્સ હેમંડ, ડૈન લેટગન, ક્વિન્ટન ડી કોક, કોનર એજથેરહુઇઝન, જ્યોર્જ લિન્ડે, બાયંદા મજોલા, ટ્રેવીન મેથ્યુ, બિનુરા ફર્નાન્ડો, કુસલ પરેરા, ડુનિથ વેલાલેજ, અકીમ અગસ્તે.
 * ભારતીય ખેલાડીઓ: સાદેક હુસૈન, વિષ્ણુ સોલંકી, સાબિર ખાન, બ્રિજેશ શર્મા, કનિષ્ક ચૌહાણ, આરોન જ્યોર્જ, જિક્કુ બ્રાઇટ, શ્રીહરિ નાયર, માધવ બજાજ, શ્રીવત્સ આચાર્ય, યશરાજ પુંજા, સાહિલ પારખ, રોશન વાઘસરે, યશ ડિચોલકર, અયાઝ ખાન, ધુરમિલ મટકર, નમન પુષ્પક, પરીક્ષિત વલસાંગકર, પૂરવ અગ્રવાલ, ઋષભ ચૌહાણ, સાગર સોલંકી, ઇજાઝ સાવરિયા અને અમન શેખાવત.