નવી દિલ્હી, તા. ૦૯ ડિસેમ્બર, ૨૦૨૫ : ભારતમાં સ્ટારલિંક ઇન્ટરનેટની કિંમતોને લઈને સોમવારે, ૮ ડિસેમ્બરના રોજ સામે આવેલી માહિતી સાચી નહોતી. સ્ટારલિંકની વાઇસ પ્રેસિડેન્ટ ઑફ બિઝનેસ ઑપરેશન્સ, લૉરેન ડ્રેયરે, મંગળવારે સોશિયલ મીડિયા પ્લેટફોર્મ 'X' પર સ્પષ્ટતા કરતા જણાવ્યું કે આ બધું એક "કન્ફિગરેશન ગ્લિચ" (Configuration Glitch) ના કારણે થયું હતું.
લૉરેન ડ્રેયરે સ્પષ્ટ કર્યું કે સ્ટારલિંક ઇન્ડિયાની વેબસાઇટ હજી લાઇવ નથી, અને ભારતમાં સેવાના વાસ્તવિક ભાવ અંગે હજી સુધી કોઈ સત્તાવાર જાહેરાત કરવામાં આવી નથી. તેમણે એમ પણ કહ્યું કે એલન મસ્કની કંપની સ્ટારલિંક ભારતમાં હજી કોઈપણ ગ્રાહક પાસેથી ઓર્ડર સ્વીકારી રહી નથી.
સોમવારે સામે આવેલા 'ગ્લિચ' વાળા ડેટામાં ઘરેલુ પ્લાનની કિંમત ₹૮,૬૦૦ પ્રતિ મહિનો દર્શાવવામાં આવી હતી, જ્યારે સેટેલાઇટ ડીશ, રાઉટર અને અન્ય ટૂલ્સનો સમાવેશ કરતી હાર્ડવેર કિટની કિંમત ₹૩૪,૦૦૦ જણાવવામાં આવી હતી. આની સાથે ૩૦ દિવસનો ટ્રાયલ પિરિયડ અને અનલિમિટેડ બેન્ડવિડ્થનો વિકલ્પ પણ બતાવવામાં આવ્યો હતો, જે તમામ માહિતી અયોગ્ય હતી.
નોંધનીય છે કે, એલન મસ્કની કંપની સ્ટારલિંકને આ વર્ષે જુલાઈમાં ભારતમાં કારોબાર કરવા માટે પાંચ વર્ષનો રેગ્યુલેટરી પરમિટ મળ્યો હતો. લૉરેન ડ્રેયરે પોસ્ટમાં વધુમાં લખ્યું કે, "અમે ભારતની જનતાને સ્ટારલિંકની હાઇ-સ્પીડ ઇન્ટરનેટ સેવા સાથે જોડવા માટે ઉત્સાહિત છીએ. અમારી ટીમો અંતિમ સરકારી મંજૂરી મેળવવા પર કામ કરી રહી છે, જેથી સેવા (અને વેબસાઇટ) શરૂ કરી શકાય." સ્ટારલિંકની સેવાઓ 'વેધર રેઝિલિએન્ટ' છે અને ૯૯.૯%થી વધુ અપટાઇમ એટલે કે લગભગ અવિરત ઇન્ટરનેટ કનેક્શનનું વચન આપે છે. આમાં 'પ્લગ-એન્ડ-પ્લે' સુવિધા પણ મળે છે.