મુંબઈ, તા.૯: એશિયન બજારોમાં ઘટાડા વચ્‍ચે લાલ રંગમાં ખુલ્‍યા બાદ ભારતીય શેરબજારમાં તીવ્ર ઘટાડો થયો હતો. યુએસ પ્રમુખ ડોનાલ્‍ડ ટ્રમ્‍પે ભારતમાંથી આયાત થતા ચોખા પર ટેરિફ લાદવાની ધમકી આપી છે. આનાથી રોકાણકારોના સેન્‍ટિમેન્‍ટ પર નકારાત્‍મક અસર પડી છે અને યુએસ સાથે વેપાર સોદાની આશાઓ પર પાણી ફરી વળ્‍યું છે. તાજેતરના ઘટાડા સાથે, બે ટ્રેડિંગ સત્રોમાં સેન્‍સેક્‍સ ૧,૩૦૦ પોઈન્‍ટ એટલે કે ૧.૫% થી વધુ ઘટયો છે. નિફ્‌ટી ૫૦ માત્ર બે સત્રમાં લગભગ ૨% ઘટયો છે.

શેરબજારના તાજેતરના ક્રેશથી રોકાણકારોને નોંધપાત્ર નુકસાન થયું છે. ગ્‍લ્‍ચ્‍ પર લિસ્‍ટેડ કંપનીઓનું માર્કેટ કેપ શુક્રવારે રૂ.૪૭૧,૭૧,૦૪૨ કરોડથી ઘટીને રૂ.૪૬૦,૯૪,૯૭૬ કરોડ થયું છે. આમ, છેલ્લા બે ટ્રેડિંગ સત્રોમાં રોકાણકારોએ રૂ.૧૦,૭૬,૦૬૫ કરોડ ગુમાવ્‍યા છે.

અમેરિકી ડોલર સામે રૂપિયાની નબળાઈ રોકાણકારો માટે ચિંતાનો વિષય છે. મંગળવારે શરૂઆતના વેપારમાં સ્‍થાનિક ચલણ ૧૦ પૈસા ઘટીને રૂ.૯૦.૧૫ પ્રતિ ડોલર થયું. કંપનીઓ, આયાતકારો અને વિદેશી પોર્ટફોલિયો રોકાણકારો તરફથી ડોલરની માંગને કારણે રોકાણકારોના સેન્‍ટિમેન્‍ટ પર અસર પડી. સોમવારે રૂપિયો યુએસ ડોલર સામે રૂ.૯૦.૦૫ પર બંધ થયો હતો.

ભારત અને યુએસ વેપાર સોદો કરી રહ્યા છે, પરંતુ હજુ સુધી કોઈ જાહેરાત કરવામાં આવી નથી. જો કે, યુએસ વેપાર વાટાઘાટકારો વેપાર વાટાઘાટો ચાલુ રાખવા માટે આ અઠવાડિયે ભારતમાં રહેશે. જો કે, એવું માનવામાં આવે છે કે ક્રિસમસ અને નવા વર્ષની રજાઓને કારણે ડિસેમ્‍બરમાં કોઈ સોદો નક્કી થશે નહીં.

યુએસ સેન્‍ટ્રલ બેંક, ફેડરલ રિઝર્વના બુધવારે વ્‍યાજ દરના નિર્ણય પહેલા વૈશ્વિક બજારો સાવધ દેખાય છે. રોકાણકારો અપેક્ષા રાખે છે કે સેન્‍ટ્રલ બેંક વ્‍યાજ દરમાં ૨૫ બેસિસ પોઈન્‍ટનો ઘટાડો કરશે. જોકે, નિષ્‍ણાતો માને છે કે ફેડનું આકરું વલણ બજારના સેન્‍ટિમેન્‍ટને વધુ અસર કરી શકે છે.