જકાર્તા, તા. ૦૯ ડિસેમ્બર, ૨૦૨૫ : ઇન્ડોનેશિયા નાં મધ્ય જકાર્તાના કેમાયોરન, સેમપાકા બારુ સ્થિત ટેરા ડ્રોન ઓફિસ બિલ્ડિંગમાં મંગળવારે બપોરે લાગેલી ભીષણ આગમાં ઓછામાં ઓછા ૨૦ લોકોના મોત થયાની પુષ્ટિ અધિકારીઓએ કરી છે. સેન્ટ્રલ જકાર્તાના પોલીસ વડા, સિનિયર કમિશનર સુસત્યો પુર્નોમો કોન્ડ્રોએ ઘટનાસ્થળે પત્રકારોને જણાવ્યું હતું કે અત્યાર સુધીમાં પાંચ પુરુષો અને ૧૫ મહિલાઓ સહિત ૨૦ મૃતદેહો બહાર કાઢવામાં આવ્યા છે. સુસત્યોએ ઉમેર્યું હતું કે આગ ફાટી નીકળી ત્યારે પીડિતો સાત માળની આ બિલ્ડિંગમાં ફસાયા હતા.
સાક્ષીઓના જણાવ્યા અનુસાર, આગ ફાટી નીકળવાના થોડા સમય પહેલા પ્રથમ માળે આવેલી બેટરીમાંથી જોરદાર વિસ્ફોટ થયો હોવાનું માનવામાં આવે છે. આગ ઝડપથી ફેલાઈ, જેનાથી લગભગ આખું બિલ્ડિંગ લપેટમાં આવી ગયું હતું. ઉપરના માળના કર્મચારીઓ ગભરાઈને મદદ માટે છત પર દોડી ગયા હતા. લગભગ ૩૦ મિનિટ પછી, કટોકટી પ્રતિભાવકર્તાઓએ છત પરથી ઇમરજન્સી સીડીઓનો ઉપયોગ કરીને પીડિતોને બહાર કાઢ્યા હતા.
બચાવ ટીમો હાલમાં પહેલાથી પાંચમા માળ સુધીની તપાસ પૂર્ણ કર્યા પછી છઠ્ઠા માળ પર ધ્યાન કેન્દ્રિત કરી રહી છે. પોલીસ વડાએ કહ્યું કે, "ફાયર ફાઇટર્સના મતે છઠ્ઠા માળ સુધી પહોંચવું ખાસ કરીને પડકારજનક છે." તેમણે લોકોને સંયુક્ત બચાવ ટીમની સફળતા માટે પ્રાર્થના કરવા વિનંતી કરી હતી, કારણ કે હજુ પણ સાતમા માળે વધુ પીડિતો ફસાયેલા હોવાની આશંકા છે. તમામ મૃતદેહોને ઓળખ માટે પૂર્વ જકાર્તાની પોલીસ હોસ્પિટલમાં મોકલી દેવાયા છે.
આગની જાણ સ્થાનિક રહેવાસીઓએ બપોરે ૧૨:૪૩ વાગ્યે કરી હતી, અને સાત મિનિટ પછી નજીકના સ્ટેશનો પરથી ફાયર ટ્રક મોકલવામાં આવી હતી. બપોર સુધીમાં આગને કાબૂમાં લેવા અને ગીચ વસ્તીવાળા વિસ્તારમાં નજીકની ઇમારતોમાં ફેલાતી અટકાવવા માટે ૨૫ થી ૨૯ ફાયર ટ્રક અને ૮૯ થી ૧૦૧ કર્મચારીઓને તૈનાત કરવામાં આવ્યા હતા. સુસત્યોએ જણાવ્યું હતું કે, પોલીસ ઘટનાસ્થળે સંપૂર્ણ તપાસ કરશે, જ્યારે નેશનલ પોલીસ ફોરેન્સિક લેબોરેટરી (પુસ્લાબોર) આગ લાગવાનું ચોક્કસ કારણ નક્કી કરશે. આગ સંપૂર્ણ રીતે કાબૂમાં આવ્યા બાદ ફોરેન્સિક તપાસ કરવામાં આવશે.