લંડન, તા.09 : યુકેમાં ઇમિગ્રેશન કાયદાઓનો દુરુપયોગ કરીને ભારતીય સ્થળાંતર કરનારાઓને ગેરકાયદેસર રીતે નોકરી આપવાના ગુનામાં દક્ષિણ-પૂર્વ ઇંગ્લેન્ડ સ્થિત કેર હોમ એજન્સીના ડિરેક્ટરને અઢી વર્ષની જેલની સજા ફટકારવામાં આવી છે. 50 વર્ષીય બેનોય થોમસ, જેણે પોતે 2012માં બ્રિટિશ નાગરિકતા મેળવી હતી, તેને જુલાઈમાં લુઇસ ક્રાઉન કોર્ટમાં ટ્રાયલ બાદ દોષિત ઠેરવવામાં આવ્યો હતો અને શુક્રવારે સજા સંભળાવવામાં આવી હતી. તેમને 8 વર્ષ માટે કંપની ડિરેક્ટર બનવા પર પણ ગેરલાયક ઠેરવવામાં આવ્યા છે.
ક્રાઉન પ્રોસિક્યુશન સર્વિસ (CPS) ના અહેવાલ મુજબ, થોમસે પૂર્વ સસેક્સમાં બેક્સહિલ-ઓન-સી ખાતે પોતાની 'એ ક્લાસ કેર રિક્રુટમેન્ટ લિમિટેડ' દ્વારા 13 ભારતીય નાગરિકો ને સંભાળ સહાયકો તરીકે નોકરીએ રાખ્યા હતા, જ્યારે તે જાણતો હતો કે તેમને યુકેમાં કામ કરવાનો કોઈ કાયદેસર અધિકાર નથી. સીપીએસના વિશેષજ્ઞ પ્રોસિક્યુટર કેટી સેમવેઝે જણાવ્યું હતું કે, થોમસે જાણી જોઈને ઇમિગ્રેશન કાયદાનું ઉલ્લંઘન કર્યું. તેમણે ભારપૂર્વક જણાવ્યું કે, ગેરકાયદેસર રીતે નોકરી પર રાખવામાં આવેલા ઘણા લોકો પાસે પૂરતી તાલીમ કે તબીબી કુશળતા નહોતી, જેના કારણે સંભાળની જરૂર હોય તેવા સૌથી સંવેદનશીલ લોકોની સલામતી અને સુખાકારી જોખમમાં મુકાઈ રહી હતી.
હોમ ઑફિસની એજન્સી, ઇમિગ્રેશન એન્ફોર્સમેન્ટ દ્વારા કરવામાં આવેલી તપાસમાં જાણવા મળ્યું હતું કે 2017 અને 2018 ની વચ્ચે થોમસે આ 13 વ્યક્તિઓના ગેરકાયદેસર ઇમિગ્રેશનમાં મદદ કરી હતી. કોર્ટને કહેવામાં આવ્યું હતું કે થોમસે ગેરકાયદેસર ભરતી કામગીરી હાથ ધરવા માટે દક્ષિણ ભારતમાં તેના સંપર્કો અને યુકે ઇમિગ્રેશન સિસ્ટમ વિશેના પોતાના જ્ઞાનનો ઉપયોગ કર્યો હતો. એટલું જ નહીં, ધરપકડ પહેલાં તેણે ગેરેજમાં ઇમિગ્રેશન અધિકારીઓ પાસેથી રોજગાર દસ્તાવેજો છુપાવવાનો પણ પ્રયાસ કર્યો હતો.
પ્રોસિક્યુટરોએ જ્યુરી સમક્ષ ટાઈમશીટ, ઇન્વોઇસ, ટેક્સ્ટ સંદેશાઓ અને બેંક સ્ટેટમેન્ટ સહિતના વ્યાપક પુરાવા રજૂ કર્યા, જેણે સાબિત કર્યું કે થોમસે ઇરાદાપૂર્વક કાયદાનું ઉલ્લંઘન કર્યું હતું. ચાર મહિના પહેલાંની ટ્રાયલમાં, થોમસને યુકેના ઇમિગ્રેશન એક્ટ 1971ની કલમ 25(1) વિરુદ્ધ, ગેરકાયદેસર ઇમિગ્રેશનમાં મદદ કરવાના 13 ગુનાઓમાં દોષિત ઠેરવવામાં આવ્યા હતા.