ચિત્રકૂટ, તા.10 : ભગવાન રામ સાથે સંકળાયેલા પવિત્ર શહેર ચિત્રકૂટમાં નવા બનેલા એરપોર્ટ પરથી શરૂ થયેલી ફ્લાઇટ કામગીરી અચાનક બંધ થવાને કારણે સ્થાનિકોમાં ઉભી થયેલી ચિંતાનો મામલો હવે સંસદ સુધી પહોંચ્યો છે. ચિત્રકૂટના સાંસદ કૃષ્ણ શિવશંકર પટેલ દ્વારા લોકસભામાં પૂછાયેલા સવાલના જવાબમાં નાગરિક ઉડ્ડયન મંત્રાલય (MoCA) એ મોટું કારણ જાહેર કર્યું છે. ઉડાન યોજના હેઠળ બુંદેલખંડના આ એકમાત્ર એરપોર્ટ પરથી ફ્લાયબિગ એરલાઇન્સે માર્ચ 2024 માં ચિત્રકૂટ અને લખનૌ વચ્ચે ફ્લાઇટ્સ શરૂ કરી હતી, જેનાથી માત્ર એક કલાકમાં અંતર કપાઈ જતું હતું અને સ્થાનિક વ્યવસાયો તેમજ યાત્રાળુઓને મોટો ફાયદો થયો હતો. જોકે, ડિસેમ્બર 2024 માં આ સેવા અચાનક સ્થગિત કરી દેવાઈ હતી.
મંત્રાલયના જણાવ્યા મુજબ, ફ્લાઇટ કામગીરી સ્થગિત થવા પાછળ એક નહીં પણ અનેક કારણો જવાબદાર હતા. સૌથી મોટું કારણ એ હતું કે ચિત્રકૂટ એરપોર્ટ ટેબલ-ટોપ રનવે ધરાવે છે અને શિયાળા દરમિયાન અહીં ગાઢ ધુમ્મસની સમસ્યા રહે છે. મોડી સવાર સુધી ધુમ્મસ છવાયેલો રહેતો હોવાથી અને બપોર પછી પણ વિઝિબિલિટી નબળી હોવાથી, ટેબલ-ટોપ રનવે પર ટેકઓફ અને લેન્ડિંગ જોખમી બની ગયા હતા. આ ઉપરાંત, લખનૌ એરપોર્ટ પર ચાલી રહેલા રનવે રી-કાર્પેટિંગ કાર્યએ પણ ચિત્રકૂટ ઓપરેશનને અસર કરી હતી. સાથે જ, વિમાનની ઉપલબ્ધતાનો અભાવ પણ એક મુખ્ય અવરોધ બન્યો હતો.
આ પડકારોનો સામનો કરવામાં અસમર્થ રહેતા, ફ્લાયબિગ એરલાઇન્સે આખરે ચિત્રકૂટ-લખનૌ RCS રૂટના અધિકારો સ્કાયહોપ એવિએશન પ્રાઇવેટ લિમિટેડને ટ્રાન્સફર કરી દીધા છે. મંત્રાલયે સ્પષ્ટતા કરી છે કે સ્કાયહોપ હાલમાં એર ઓપરેટર સર્ટિફિકેટ (AOC) મેળવવા અને જરૂરી વિમાનની વ્યવસ્થા કરવામાં વ્યસ્ત છે. આ બંને પ્રક્રિયાઓ પૂર્ણ થયા પછી જ ચિત્રકૂટ એરપોર્ટ પરથી ફ્લાઇટ ઓપરેશન ફરી શરૂ થશે. જોકે, મંત્રાલય દ્વારા પુનઃપ્રારંભની કોઈ ચોક્કસ સમયમર્યાદા આપવામાં આવી નથી, પરંતુ સ્થાનિકોને આશા છે કે ધાર્મિક પર્યટનને વેગ આપતી આ સેવા ટૂંક સમયમાં જ પાછી શરૂ થશે.