બેંગકોક:  થાઈલેન્ડ અને કંબોડિયા વચ્ચેનો સરહદી સંઘર્ષ ત્રીજા દિવસમાં પ્રવેશ્યો છે, જેમાં બંને દેશો દ્વારા ડ્રોન, BM-૨૧ રોકેટ, ટેન્ક અને F-૧૬ જેટ જેવા ભારે શસ્ત્રોનો આક્રમક ઉપયોગ થઈ રહ્યો છે. આ ગંભીર લડાઈને કારણે સરહદની બંને બાજુએ ૬૦૦,૦૦૦ થી વધુ નાગરિકોને માત્ર ત્રણ દિવસમાં તેમના ઘર છોડીને ભાગી જવાની ફરજ પડી છે. અત્યાર સુધીમાં, આ સંઘર્ષમાં ૧૩ સૈનિકોના મોતની પુષ્ટિ થઈ છે.

થાઈ સૈન્યએ ચોંકાવનારી વિગતો આપતા જણાવ્યું છે કે રાતભર ચાલેલી લડાઈમાં કંબોડિયન દળોએ થાઈ સ્થાનો, ખાસ કરીને ચોંગ બોક અને ચોંગ એન મા પર ૮૦ થી વધુ ડ્રોન હુમલા, BM-૨૧ મલ્ટીપલ રોકેટ લોન્ચર અને ટેન્ક ફાયરિંગ કર્યું હતું. થાઈલેન્ડના સંરક્ષણ મંત્રાલયના પ્રવક્તાએ જણાવ્યું કે સાત પ્રાંતોમાં ૪૦૦,૦૦૦ થી વધુ લોકોને સ્થળાંતરિત કરવામાં આવ્યા છે. બુધવારે સવારે, કંબોડિયાથી છોડવામાં આવેલા રોકેટ સુરીનમાં ફાનોમ ડોંગ રાક હોસ્પિટલ નજીક પડ્યા હતા, જેના કારણે દર્દીઓ અને સ્ટાફને બંકરોમાં આશ્રય લેવાની ફરજ પડી હતી, જે સંઘર્ષની ગંભીરતા દર્શાવે છે.

દરમિયાન, કંબોડિયન સત્તાવાળાઓએ પણ થાઈલેન્ડ પર ઉશ્કેરણીનો આરોપ લગાવ્યો છે અને જણાવ્યું છે કે પાંચ પ્રાંતોમાં ૧૦૧,૨૨૯ લોકોને સુરક્ષિત આશ્રયસ્થાનોમાં ખસેડવામાં આવ્યા છે. કંબોડિયન અહેવાલો મુજબ, થાઈ F-૧૬ જેટ્સે તેમના દેશના બે વિસ્તારોમાં હુમલો કર્યો હતો. આ બે દક્ષિણપૂર્વ એશિયાઈ પડોશીઓ તેમની ૮૦૦ કિલોમીટરની સરહદ પર અનેક ઐતિહાસિક મંદિરોના સ્થળોને લઈને વારંવાર અથડામણ કરે છે. ઉલ્લેખનીય છે કે, જુલાઈમાં પાંચ દિવસના યુદ્ધ બાદ યુએસ પ્રમુખ ટ્રમ્પના સમર્થનથી યુદ્ધવિરામ થયો હતો, અને હવે ટ્રમ્પે ફરી એકવાર બંને દેશો વચ્ચે મધ્યસ્થી કરવાની ઓફર કરી છે.