નવી દિલ્હી : બુધવારે લોકસભામાં ચૂંટણી સુધારા પરની ચર્ચા દરમિયાન ગૃહમંત્રી અમિતભાઇ શાહે વિપક્ષ, ખાસ કરીને કોંગ્રેસ દ્વારા ઉઠાવવામાં આવેલા પ્રશ્નોનો આકરા શબ્દોમાં જવાબ આપ્યો હતો. તેમણે સ્પેશિયલ ઇન્ટેન્સિવ રિવિઝન (SIR)ની પ્રક્રિયા અને તેની આવશ્યકતા સમજાવતા કહ્યું કે, સ્વચ્છ મતદાર યાદીઓ અને સ્વસ્થ લોકશાહી જાળવવા માટે આ પ્રક્રિયા જરૂરી છે.
અમિતભાઇ શાહે SIR નો અર્થ માત્ર ત્રણ શબ્દોમાં સમજાવ્યો:
"અમારી નીતિ શોધો (Detect), કાઢી નાખો (Delete), દેશનિકાલ કરો (Deport) ની છે, અને અમે તેને બંધારણીય પ્રક્રિયા દ્વારા પૂર્ણ કરીશું."
તેમણે વિપક્ષ, ખાસ કરીને કોંગ્રેસ પર આકરા પ્રહાર કરતા આરોપ લગાવ્યો કે તેમની નીતિ ઘૂસણખોરીને સામાન્ય બનાવવાની, તેને માન્યતા આપવાની અને મતદાર યાદીમાં સમાવીને તેને ઔપચારિક બનાવવાની છે.
સંસદમાં ગરમાગરમ બોલાચાલી અને વોકઆઉટ
ચર્ચા દરમિયાન રાહુલ ગાંધી અને અમિતભાઇ  શાહ વચ્ચે ગરમાગરમ બોલાચાલી થઈ હતી. અમિતભાઇ શાહે કહ્યું કે ૨૦૦૪ સુધી કોઈ પણ રાજકીય પક્ષે મતદાર યાદીઓના SIR નો વિરોધ કર્યો ન હતો.
જ્યારે અમિતભાઇ શાહ ઘૂસણખોરો વિશે વાત કરી રહ્યા હતા, ત્યારે કોંગ્રેસના સાંસદોએ ગૃહમાંથી વોકઆઉટ કર્યો હતો. જેના પર શાહે કટાક્ષ કર્યો, "તેઓ ગૃહમાંથી કેમ ભાગી ગયા? હું કોંગ્રેસ પાર્ટી વિશે વાત કરી રહ્યો ન હતો, હું ઘૂસણખોરો વિશે વાત કરી રહ્યો હતો."
EVM અને પૂર્વ વડાપ્રધાનોનો ઉલ્લેખ
અમિતભાઇ શાહે EVM પર વિપક્ષ દ્વારા ઉઠાવવામાં આવતા પ્રશ્નોનો પણ જવાબ આપ્યો. તેમણે આરોપ લગાવ્યો કે તેમના (કોંગ્રેસના) સમય દરમિયાન, બિહાર અને ઉત્તર પ્રદેશમાં આખા મતપેટીઓ ગાયબ થઈ જતા હતા, પરંતુ EVM આવ્યા પછી આ બધું બંધ થઈ ગયું છે.
તેમણે ભૂતકાળના સંદર્ભો આપતા કહ્યું કે:
•    રાજીવ ગાંધીના શાસન દરમિયાન ૧૫ માર્ચ, ૧૯૮૯ ના રોજ EVM રજૂ કરવામાં આવ્યા હતા.
•    ૨૦૦૪ની ચૂંટણીઓ EVM નો ઉપયોગ કરીને યોજાઈ હતી, જેમાં કોંગ્રેસે જીત મેળવી હતી, અને ત્યારે EVM પર ચર્ચા બંધ થઈ ગઈ હતી.
•    ૨૦૦૯ની ચૂંટણીઓ પણ EVM દ્વારા યોજાઈ, કોંગ્રેસ જીતી, અને ચર્ચા ફરી બંધ થઈ ગઈ.
શાહે કટાક્ષ કર્યો કે, "EVM દોષિત નથી; ચૂંટણી જીતવાની પદ્ધતિ જનાદેશ નહોતી, તે ભ્રષ્ટ પદ્ધતિ હતી. આજે તેનો પર્દાફાશ થયો છે."