ટોક્યો, તા. ૧૨ ડિસેમ્બર, ૨૦૨૫ : વિશ્વભરમાં ભૂકંપના વધતા બનાવો વચ્ચે આજે ફરી એકવાર જાપાનની ધરતી ધ્રુજી ઊઠી હતી. આજે, શુક્રવાર, ૧૨ ડિસેમ્બરના રોજ જાપાનના ઉત્તરીય દરિયાકાંઠાના વિસ્તારમાં ૬.૭ ની તીવ્રતાનો શક્તિશાળી ભૂકંપ આવતાં હડકંપ મચી ગયો હતો. આ ભૂકંપની પુષ્ટિ જાપાનની જીઓફિઝિક્સ એજન્સી દ્વારા પણ કરવામાં આવી છે.
ભારતીય સમય અનુસાર સવારે ૮ વાગ્યે ને ૧૪ મિનિટે આ ભૂકંપ હચિનોહે (Hachinohe) થી ૧૧૪ કિલોમીટર પૂર્વ-ઉત્તરપૂર્વ (Eastern Northeast) માં આવ્યો હતો, અને તેની ઊંડાઈ ૧૦.૭ કિલોમીટર હતી.
દરિયાકાંઠાના વિસ્તારોમાં સુનામી:
ભૂકંપ બાદ જાપાનના તટીય ક્ષેત્રોમાં સુનામીની ચેતવણી જારી કરવામાં આવી છે. જાપાનની હવામાન વિજ્ઞાન એજન્સીએ માહિતી આપી છે કે ૧ મીટર જેટલી ઊંચી લહેરો આવવાની સંભાવના છે. ચેતવણી જારી થયાના થોડા સમય બાદ જ હચિનોહેમાં ૨૦ સેન્ટિમીટર ઊંચી સુનામીની લહેરો રેકોર્ડ કરવામાં આવી હતી.
ભૂકંપના પગલે તંત્રએ ત્વરિત કાર્યવાહી કરીને ૬,૦૦૦ થી વધુ લોકોને દરિયાકાંઠાના વિસ્તારોમાંથી સુરક્ષિત સ્થળોએ ખસી જવા માટે સલાહ આપી છે. ભૂકંપના આંચકાઓને કારણે હચિનોહે અને આસપાસના વિસ્તારોમાં લોકોમાં ગભરાહટ ફેલાયો હતો અને લોકો ડરના માર્યા પોતાના ઘરોમાંથી બહાર ભાગવા માટે મજબૂર થયા હતા. જોકે, રાહતની વાત એ છે કે ભૂકંપની ઘટનાને કારણે હાલમાં કોઈ જાનહાનિના અહેવાલ નથી.