નવી દિલ્હી : મુંબઈના ચકચારી ૨૦૨૪ BMW હિટ-એન્ડ-રન કેસમાં સુપ્રીમ કોર્ટે આજે આરોપી મિહિર શાહને જામીન આપવાનો ઈનકાર કરીને કડક સંદેશ આપ્યો છે. જસ્ટિસ દીપાંકર દત્તા અને એ.જી. મસીહની બેન્ચે સ્પષ્ટપણે કહ્યું કે, "આવા કેસોમાં કડકાઈ જરૂરી છે. આ છોકરાઓને પાઠ ભણાવવાની જરૂર છે." આ ટિપ્પણી સાથે કોર્ટે મિહિર શાહની જામીન અરજી પર સુનાવણી કરવાનો ઇનકાર કરી દીધો.

કોર્ટે ખાસ નોંધ લીધી કે આરોપી શ્રીમંત પરિવારમાંથી આવે છે અને તેના પિતા શિવસેનાના નાયબ મુખ્યમંત્રી એકનાથ શિંદેના જૂથ સાથે સંકળાયેલા હતા. આ સંજોગોને ધ્યાનમાં રાખીને અદાલતે કડક વલણ અપનાવ્યું.

મિહિર શાહ પર ૭ જુલાઈ, ૨૦૨૪ ના રોજ વરલીમાં પોતાની BMW કાર વડે સ્કૂટરને ટક્કર મારવાનો આરોપ છે. આ અકસ્માતમાં કાવેરી નખ્વાનું કરૂણ મૃત્યુ થયું હતું જ્યારે તેના પતિ પ્રદીપ નખ્વા ગંભીર રીતે ઘાયલ થયા હતા. કાવેરી નખ્વાને ટક્કર પછી કાર નીચે લગભગ દોઢ કિલોમીટર સુધી ઢસડવામાં આવી હતી. શાહની ધરપકડ ૯ જુલાઈના રોજ થઈ હતી.

મિહિર શાહે બોમ્બે હાઈકોર્ટના ૨૧ નવેમ્બરના જામીન નામંજૂર કરવાના આદેશને સુપ્રીમ કોર્ટમાં પડકાર્યો હતો. હાઈકોર્ટે પોતાના આદેશમાં જણાવ્યું હતું કે અકસ્માત સમયે આરોપી ખૂબ જ નશામાં હતો. એટલું જ નહીં, ટક્કર માર્યા પછી તેણે કાર રોકવાને બદલે ખૂબ જ ઝડપે ભાગવાનો પ્રયાસ કર્યો હતો, જે તેના ગુનાહિત ઈરાદાને દર્શાવે છે.

હાઈકોર્ટે મિહિર શાહના ઘટના પછીના વર્તનને પણ ગંભીર ગણાવ્યું હતું. પુરાવા સાથે ચેડાં કરવાના ઈરાદાથી ડ્રાઈવર સાથે સીટ બદલવી, પિતાને ફોન કરવો અને ઘટનાસ્થળેથી ભાગી જવું – આ તમામ પગલાં કાનૂની પરિણામો ટાળવાનો તેનો ઈરાદો સ્પષ્ટપણે દર્શાવે છે.

એક્સાઇઝ અધિકારીઓના અહેવાલ મુજબ, અકસ્માત પહેલા મિહિર અને તેના મિત્રોએ પબમાં વ્હિસ્કીના ૧૨ મોટા પેગ મંગાવ્યા હતા, જે દર્શાવે છે કે તે ભારે નશામાં હતો. ઉપરાંત, મિહિર શાહે દારૂ પીવા માટે ૨૫ વર્ષની કાયદેસરની ઉંમર કરતાં ઓછી ઉંમર હોવા છતાં, ખોટી ઓળખ દર્શાવી હોવાનું પણ સામે આવ્યું છે.

કાવેરી નખ્વા અને તેના પતિ પ્રદીપ નખ્વા વરલીના કોલીવાડાના માછીમાર દંપતી હતા અને ૭ જુલાઈની વહેલી સવારે માછીમારીની સફર પરથી પાછા ફરી રહ્યા હતા, ત્યારે આ ગમખ્વાર ઘટના બની હતી.