હૈદરાબાદ:વિશ્વ ફૂટબોલના મહાન ખેલાડી લિયોનેલ મેસ્સીના ભારત પ્રવાસના પ્રથમ ચરણમાં પશ્ચિમ બંગાળના કોલકાતામાં થયેલા હોબાળા અને તોડફોડની ઘટનામાંથી બોધપાઠ લઈને, હૈદરાબાદ પ્રશાસને મેસ્સીના કાર્યક્રમ માટે અભૂતપૂર્વ સુરક્ષા વ્યવસ્થા ગોઠવી છે. કોલકાતાના સોલ્ટ લેક સ્ટેડિયમમાં મેસ્સી થોડા જ સમયમાં પરત ફર્યા બાદ ગુસ્સે ભરાયેલા ચાહકોએ સ્ટેડિયમમાં તોડફોડ કરી હતી, જેના પગલે આયોજકની ધરપકડ થઈ હતી અને મુખ્યમંત્રી મમતા બેનર્જીએ માફી માંગી હતી.
આવી કોઈપણ અરાજકતા હૈદરાબાદમાં ન થાય તે માટે, રાજીવ ગાંધી ઇન્ટરનેશનલ સ્ટેડિયમને કિલ્લામાં ફેરવી દેવામાં આવ્યું છે. સ્થાનિક વહીવટીતંત્રે ૩,૦૦૦ જેટલા સુરક્ષા કર્મચારીઓને તૈનાત કર્યા છે, અને પરિસર પર ચાંપતી નજર રાખવા માટે ૪૫૦ સીસીટીવી કેમેરા લગાવવામાં આવ્યા છે. મેસ્સીની સુરક્ષા માટે આ સ્ટેડિયમમાં ત્રણ-સ્તરીય સુરક્ષા વ્યવસ્થા ગોઠવવામાં આવી છે.
હૈદરાબાદમાં મેસ્સીનો ભવ્ય કાર્યક્રમ: લિયોનેલ મેસ્સી આજે સાંજે ૭ વાગ્યે હૈદરાબાદના રાજીવ ગાંધી ઇન્ટરનેશનલ સ્ટેડિયમમાં ૭-ઓન-૭ ફૂટબોલ મેચમાં ભાગ લેશે. આ મેચમાં તેલંગાણાના મુખ્યમંત્રી રેવંત રેડ્ડી પણ હાજરી આપવાના છે. ફૂટબોલ મેચ પછી સ્ટેડિયમમાં એક ભવ્ય સંગીત કાર્યક્રમનું પણ આયોજન કરવામાં આવ્યું છે, જે ચાહકો માટે એક ઉત્સવ સમાન હશે.
હૈદરાબાદ પછીનો મેસ્સીનો પ્રવાસ: હૈદરાબાદ બાદ મેસ્સીનો ભારત પ્રવાસ નીચે મુજબ આગળ વધશે:
૧૪ ડિસેમ્બર – મુંબઈ: મેસ્સી મુંબઈના બ્રેબોર્ન સ્ટેડિયમ ખાતે રમાનારી 'પેડેલ ગોટ કપ' માં ભાગ લેશે, જેમાં બોલિવૂડના મોટા સ્ટાર્સ પણ જોડાશે. મુંબઈમાં સેલિબ્રિટી ઇવેન્ટ્સ અને આર્જેન્ટિનાના ૨૦૨૨ વર્લ્ડ કપ સંબંધિત યાદગાર વસ્તુઓની હરાજીનું આયોજન પણ થશે. મુંબઈની ઇવેન્ટમાં સચિન તેંડુલકર અને વિરાટ કોહલી જેવા દિગ્ગજ ખેલાડીઓ સાથે મેસ્સીની મુલાકાત પણ શક્ય છે.
૧૫ ડિસેમ્બર – નવી દિલ્હી: પ્રવાસના અંતિમ ચરણમાં મેસ્સી નવી દિલ્હી પહોંચશે, જ્યાં અરુણ જેટલી સ્ટેડિયમમાં એક કાર્યક્રમ યોજાશે. તેમની નવી દિલ્હીની મુલાકાત દરમિયાન મેસ્સી વડાપ્રધાન નરેન્દ્ર મોદીને પણ મળી શકે છે.