લાતુર : કોંગ્રેસના દિગ્ગજ નેતા અને ભારતના ભૂતપૂર્વ કેન્દ્રીય ગૃહમંત્રી શિવરાજ પાટીલના અંતિમ સંસ્કાર આજે તેમના ગૃહ જિલ્લા લાતુરમાં સંપૂર્ણ રાજ્ય સન્માન સાથે કરવામાં આવ્યા. અંતિમ સંસ્કારની રીત હિન્દુ ધર્મની સામાન્ય પરંપરા કરતાં અલગ હતી, જેને કારણે લોકોમાં ઉત્સુકતા જોવા મળી હતી. શિવરાજ પાટીલના પાર્થિવ દેહને લાતુરથી ૬ કિમી દૂર આવેલા વરવંતી ગામમાં તેમના પોતાના ખેતરમાં ધ્યાનસ્થ મુદ્રા (પદ્માસન) માં બેસાડીને દફનાવવામાં આવ્યો.
સામાન્ય રીતે હિન્દુ ધર્મમાં મૃત્યુ પછી અગ્નિસંસ્કાર કરવામાં આવે છે, પરંતુ પાટીલ લિંગાયત સમુદાયના હતા અને આ સમુદાયની પરંપરા અનુસાર, મૃત્યુ પછી દફનવિધિ કરવામાં આવે છે. લિંગાયત માન્યતા મુજબ, જ્યારે કોઈ વ્યક્તિનું મૃત્યુ થાય છે, ત્યારે તેની આત્મા તરત જ ભગવાન શિવ સાથે એક થઈ જાય છે અને પુનર્જન્મના ચક્રમાંથી મુક્ત થઈ જાય છે. આના કારણે અગ્નિસંસ્કારની વિધિ બિનજરૂરી બની જાય છે.
લિંગાયત પરંપરા મૃત્યુને દુઃખદ ઘટનાને બદલે ભગવાન સાથેના વિલીનીકરણના એક ઉત્સવ તરીકે જુએ છે. તેથી, શરીરને પદ્માસનમાં, ધ્યાનસ્થ મુદ્રામાં, શિવલિંગ સાથે દફનાવવામાં આવે છે.
દિગ્ગજ નેતાઓએ આપી શ્રદ્ધાંજલિ: ૯૦ વર્ષીય શિવરાજ પાટીલનું ટૂંકી માંદગી બાદ શુક્રવારે લાતુરમાં અવસાન થયું હતું. તેમના અંતિમ સંસ્કાર પહેલાં તેમને બંદૂકની સલામી આપવામાં આવી હતી. કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે, લોકસભા અધ્યક્ષ ઓમ બિરલા, મહારાષ્ટ્ર કોંગ્રેસના પ્રમુખ હર્ષવર્ધન અને લાતુર લોકસભાના સભ્ય શિવાજી કોલગે સહિત અનેક અગ્રણી નેતાઓએ તેમના નશ્વર પાર્થિવ દેહને પુષ્પાંજલિ અર્પણ કરી અંતિમ શ્રદ્ધાંજલિ આપી હતી.