જગદલપુર (છત્તીસગઢ) : કેન્દ્રીય ગૃહમંત્રી અમિતભાઇ શાહે આજે છત્તીસગઢના જગદલપુરમાં બસ્તર ઓલિમ્પિકના સમાપન સમારોહને સંબોધતા એક મોટો સંકલ્પ જાહેર કર્યો છે. તેમણે કહ્યું કે નક્સલવાદ કોઈને ફાયદો કરતું નથી અને માત્ર શાંતિ જ વિકાસનો માર્ગ મોકળો કરી શકે છે. તેમણે પુનરોચ્ચાર કર્યો કે કેન્દ્ર સરકારે ૩૧ માર્ચ, ૨૦૨૬ સુધીમાં નક્સલવાદનો અંત લાવવાનો સંકલ્પ લીધો છે.

ગૃહમંત્રીએ જાહેરાત કરી કે કેન્દ્ર સરકારે આગામી પાંચ વર્ષમાં છત્તીસગઢના બસ્તર વિભાગને દેશના સૌથી વિકસિત આદિવાસી પ્રદેશમાં પરિવર્તિત કરવાનો નિર્ણય લીધો છે. તેમણે કહ્યું કે નક્સલવાદે આ પ્રદેશમાં વિકાસને અવરોધ્યો છે, પરંતુ આ ભય દૂર થયા પછી પ્રગતિનો એક નવો અધ્યાય શરૂ થશે.

ભયનું સ્થાન આશાએ લીધું

બસ્તરના બદલાતા ચહેરા પર પ્રકાશ પાડતા શ્રી શાહે કહ્યું કે, જ્યાં એક સમયે ગોળીબારનો અવાજ સંભળાતો હતો, હવે ત્યાં શાળાના ઘંટ વાગી રહ્યા છે. જે પ્રદેશમાં વિકાસ એક દૂરનું સ્વપ્ન હતું, ત્યાં હવે રસ્તાઓ, રેલ્વે અને હાઇવે બનાવવામાં આવી રહ્યા છે. તેમણે ગેરકાયદેસર માઓવાદીઓ સાથે સંકળાયેલા લોકોને હથિયારો મૂકીને સમાજના મુખ્ય પ્રવાહમાં જોડાવા અપીલ કરી હતી.

શાહે વિશ્વાસ વ્યક્ત કર્યો કે આગામી બસ્તર ઓલિમ્પિક યોજાશે ત્યાં સુધીમાં ફક્ત બસ્તર જ નહીં, પરંતુ આખો દેશ નક્સલવાદથી મુક્ત થઈ જશે.

આ પ્રસંગે છત્તીસગઢના મુખ્યમંત્રી વિષ્ણુ દેવ સાઈ, વિધાનસભા અધ્યક્ષ ડૉ. રમણ સિંહ, નાયબ મુખ્યમંત્રીઓ અરુણ સાઓ અને વિજય શર્મા, અને ભૂતપૂર્વ આંતરરાષ્ટ્રીય ફૂટબોલર બૈચુંગ ભૂટિયા પણ હાજર રહ્યા હતા. ઓલિમ્પિકમાં આત્મસમર્પણ કરનારા નક્સલીઓ અને નક્સલ હિંસાથી પ્રભાવિત ખેલાડીઓ સહિત તમામ સાત જિલ્લાઓમાંથી લગભગ ૩,૫૦૦ ખેલાડીઓએ ભાગ લીધો હતો.