નવી દિલ્હી: દક્ષિણ ભારતીય સિનેમાના મહાનાયક અને વૈશ્વિક સુપરસ્ટાર રજનીકાંતે આજે તેમના ૭૫મા જન્મદિવસની ઉજવણી ધાર્મિક ભાવના સાથે કરી. 'થલાઈવા' એ તિરુપતિ બાલાજી મંદિરમાં દર્શન કર્યા અને આ શુભ અવસર પર ૭૨ કિલોગ્રામ સાકર, ગોળ અને અન્ય સામગ્રીઓનું તુલાભારમ અર્પણ કર્યું.
રજનીકાંતનું જીવન કોઈ ફિલ્મી વાર્તાથી ઓછું નથી, જેણે લાખો લોકોને પ્રેરણા આપી છે. કુલી અને બસ કંડક્ટર તરીકેની સામાન્ય નોકરીઓથી શરૂઆત કરીને તેઓ સિનેમાના 'થલાઈવા' બન્યા. એક વિશેષ કાર્યક્રમમાં તેમણે પોતાના સંઘર્ષના દિવસો યાદ કર્યા અને જણાવ્યું કે કેવી રીતે એક સમય હતો જ્યારે તેઓ માત્ર ૧૦ પૈસા કમાવવા માટે ચોખાની બોરીઓ ઉઠાવતા હતા.
કે. બાલચંદરની નજરે પરખાઈ પ્રતિભા: રજનીકાંતના જીવનમાં વળાંક ત્યારે આવ્યો જ્યારે સુપ્રસિદ્ધ દિગ્દર્શક કે. બાલચંદરે તેમની અસાધારણ પ્રતિભાને પારખી. બાલચંદરે જ રજનીકાંતને સિનેમા જગતમાં પ્રવેશ કરાવ્યો અને તેમને એક અભિનેતા તરીકે મોટો મંચ આપ્યો, જેના પછી રજનીકાંતે પાછળ વળીને જોયું નથી. તેમની યુનિક સ્ટાઇલ, મેનરિઝમ અને પાવરફુલ સ્ક્રીન પ્રેઝન્સને કારણે આજે તેઓ માત્ર દક્ષિણ ભારતમાં જ નહીં, પણ સમગ્ર વિશ્વમાં 'સિનેમાના ભગવાન' તરીકે પૂજાય છે.
આજે પણ ૭૫ વર્ષની ઉંમરે રજનીકાંતનો ઉત્સાહ યુવાનોને શરમાવે તેવો છે અને તેમની ફિલ્મો રિલીઝ થતા જ ચાહકોમાં ઉત્સવનું વાતાવરણ સર્જાઈ જાય છે.