મુંબઈ: ભારતીય ક્રિકેટ ટીમના સ્ટાર બેટ્સમેન અને પૂર્વ કેપ્ટન વિરાટ કોહલી આજે તેમની પત્ની અભિનેત્રી અનુષ્કા શર્મા સાથે મુંબઈ એરપોર્ટ પર જોવા મળતાં તેમના ચાહકોમાં ઉત્સાહ છવાઈ ગયો છે. કોહલીની આ વાપસી એવા સમયે થઈ છે જ્યારે આર્જેન્ટિનાના સ્ટાર ફૂટબોલર અને વિશ્વના મહાન ખેલાડી લિયોનેલ મેસ્સી પણ તેમના 'GOAT ટૂર'ના ભાગરૂપે ભારતના પ્રવાસે છે.
વિરાટ કોહલી તાજેતરમાં દક્ષિણ આફ્રિકા સામેની ત્રણ મેચની ODI શ્રેણીનો ભાગ હતો. શ્રેણી પૂર્ણ થયા બાદ તેઓ લંડન પરત ફર્યા હતા, પરંતુ મેસ્સીના પ્રવાસ વચ્ચે તેમની અચાનક ભારતમાં વાપસીથી બંને સ્પોર્ટ્સ દિગ્ગજોની સંભવિત મુલાકાત અંગેની અટકળોએ જોર પકડ્યું છે.
વિરાટ કોહલી પોતે ફૂટબોલનો મોટો ચાહક છે અને તે ઘણીવાર લિયોનેલ મેસ્સી પ્રત્યે પોતાનો આદર વ્યક્ત કરી ચૂક્યો છે. જો મુંબઈમાં આ બંને વિશ્વ કક્ષાના એથ્લેટ્સની મુલાકાત થાય તો તે ભારતીય રમતપ્રેમીઓ માટે એક ઐતિહાસિક અને યાદગાર ક્ષણ બની રહેશે. હાલમાં, કોહલીની વાપસીનું ચોક્કસ કારણ જાહેર થયું નથી, પરંતુ આ બે ગ્લોબલ આઇકનની એક જ શહેરમાં હાજરીએ ચાહકોમાં ઉત્સુકતા વધારી દીધી છે.