દક્ષિણ આફ્રિકાના ક્વાઝુલુ-નાતાલ પ્રાંતમાં નિર્માણાધીન ચાર માળનું હિન્દુ મંદિર ધરાશાયી થતા મોટી દુર્ઘટના સર્જાઈ. આ દુર્ઘટનામાં 52 વર્ષીય ભારતીય મૂળના એક વ્યક્તિ સહિત ચાર લોકોના મોત થયા. શુક્રવારે ઇથેક્વીનીના ઉત્તરે રેડક્લિફમાં એક ઢાળવાળી ટેકરી પર સ્થિત ન્યૂ અહોબિલમ ટેમ્પલ ઓફ પ્રોટેક્શનમાં આ અકસ્માત થયો હતો, જ્યારે બાંધકામ દરમિયાન ઇમારતનો એક ભાગ અચાનક તૂટી પડ્યો હતો.

શુક્રવારે એક બાંધકામ કામદાર અને એક ભક્તના મૃત્યુની પુષ્ટિ કરવામાં આવી હતી અને શનિવારે બચાવ ટીમોએ વધુ મૃતદેહો મેળવ્યા બાદ મૃત્યુઆંક ચાર થયો હતો. સ્થાનિક મીડિયાએ અધિકારીઓને ટાંકીને જણાવ્યું હતું કે ચાર મૃતકોમાંથી એકની ઓળખ મંદિર ટ્રસ્ટના એક્ઝિક્યુટિવ સભ્ય અને બાંધકામ પ્રોજેક્ટ મેનેજર વિક્કી જયરાજ પાંડે તરીકે થઈ છે

 રિએક્શન યુનિટ સાઉથ આફ્રિકાના પ્રવક્તા પ્રેમ બલરામે સ્થાનિક મીડિયાને જણાવ્યું હતું કે બચાવકર્તાઓ બે દિવસથી કાટમાળ નીચે દટાયેલા પાંચમા મૃતદેહને બહાર કાઢવાનો પ્રયાસ કરી રહ્યા હતા. પરંતુ ખરાબ હવામાનને કારણે શનિવારે બપોરે તેમનું કાર્ય બંધ કરવાની ફરજ પડી હતી. હાલમાં તે અજ્ઞાત છે કે હજુ કેટલા કામદારો અને મંદિરના અધિકારીઓ કાટમાળ નીચે દટાયેલા છે. ફસાયેલા લોકોમાંથી એકના સેલફોન કોલ દ્વારા શરૂઆતના બચાવ પ્રયાસોનું માર્ગદર્શન આપવામાં આવ્યું હતું, પરંતુ શુક્રવારે મોડી સાંજે સંપર્ક તૂટી ગયો હતો. 

  મંદિરને ગુફા જેવું બનાવવા માટે ડિઝાઇન કરવામાં આવ્યું હતું. જેમાં ભારતમાંથી લાવવામાં આવેલા અને સ્થળ પર ખોદવામાં આવેલા ખડકોનો ઉપયોગ કરવામાં આવ્યો હતો. બાંધકામ પાછળના પરિવારે દાવો કર્યો હતો કે તેમાં ભગવાન નૃસિંહદેવની વિશ્વની સૌથી મોટી પ્રતિમાઓમાંથી એક હશે.