મુંબઈ, તા.17: બોલિવૂડની ફિટનેસ ક્વીન શિલ્પા શેટ્ટી માટે આજની સવાર આંચકાજનક રહી છે. અભિનેત્રી એક પછી એક કાનૂની ગૂંચવણોમાં ફસાતી જોવા મળી રહી છે. બુધવારે વહેલી સવારે આવકવેરા વિભાગ (Income Tax Department) ની ટીમોએ શિલ્પા શેટ્ટીની મુંબઈ સ્થિત પ્રખ્યાત રેસ્ટોરન્ટ 'બસ્તિયન' (Bastian) પર અચાનક દરોડા પાડ્યા હતા. આ કાર્યવાહીથી મનોરંજન અને બિઝનેસ જગતમાં ભારે ખળભળાટ મચી ગયો છે.

IT દરોડા અને દસ્તાવેજોની તપાસ

મળતી માહિતી મુજબ, આવકવેરાના અધિકારીઓ સવારે જ રેસ્ટોરન્ટ પહોંચી ગયા હતા અને કર સંબંધિત દસ્તાવેજો તેમજ નાણાકીય વ્યવહારોની તપાસ શરૂ કરી હતી. શિલ્પા શેટ્ટી અને જાણીતા ઉદ્યોગપતિ રણજીત બિન્દ્રાની ભાગીદારીમાં ચાલતી આ રેસ્ટોરન્ટ તેના લક્ઝુરિયસ વાતાવરણ અને સીફૂડ માટે સેલિબ્રિટીઓમાં ખૂબ લોકપ્રિય છે. જોકે, અધિકારીઓએ હજુ સુધી આ સર્ચ ઓપરેશન અંગે કોઈ સત્તાવાર નિવેદન જારી કર્યું નથી, પરંતુ કરોડોના હિસાબ-કિતાબની તપાસ ચાલી રહી હોવાનું મનાય છે.

બેંગલુરુમાં પણ ફસાઈ 'બસ્તિયન'

મુશ્કેલી માત્ર મુંબઈ સુધી સીમિત નથી. આ દરોડાના માત્ર એક દિવસ પહેલા જ બેંગલુરુના સેન્ટ માર્ક્સ રોડ પર આવેલી 'બસ્તિયન' રેસ્ટોરન્ટ સામે પણ પોલીસ કાર્યવાહી થઈ છે. આરોપ છે કે 11 ડિસેમ્બરની રાત્રે નિર્ધારિત સમય મર્યાદા પૂરી થઈ ગઈ હોવા છતાં, રાત્રે 1:30 વાગ્યા સુધી રેસ્ટોરન્ટ ખુલ્લું રાખવામાં આવ્યું હતું અને મોડી રાત સુધી પાર્ટીઓ ચાલતી હતી. આ મામલે ક્યુબન પાર્ક પોલીસ સ્ટેશનમાં કર્ણાટક પોલીસ એક્ટની કલમ 103 હેઠળ FIR દાખલ કરવામાં આવી છે.

શિલ્પા શેટ્ટીનો વળતો પ્રહાર

પોતાની પ્રતિષ્ઠા પર સવાલ ઉઠતા શિલ્પા શેટ્ટીએ મૌન તોડ્યું છે. ઇન્સ્ટાગ્રામ પર એક સત્તાવાર નિવેદન જાહેર કરતા તેણે કહ્યું કે, "અમે આ તમામ પાયાવિહોણા આરોપોને સંપૂર્ણપણે નકારીએ છીએ. આ મામલાને કોઈ પણ કાનૂની આધાર વિના ગુનાહિત સ્વરૂપ આપવામાં આવી રહ્યું છે." તેણે વધુમાં જણાવ્યું કે આ મામલે હાઈકોર્ટમાં અરજી કરવામાં આવી છે અને તેને દેશની ન્યાય વ્યવસ્થા પર પૂરો વિશ્વાસ છે. શિલ્પાએ મીડિયાને પણ આ મામલે સંયમ રાખવાની અપીલ કરી છે.

શિલ્પા શેટ્ટી અગાઉ પણ તેના પતિ રાજ કુન્દ્રા સાથે જોડાયેલા વિવાદોને કારણે ચર્ચામાં રહી છે, ત્યારે હવે પોતાની માલિકીની રેસ્ટોરન્ટ્સ પર થઈ રહેલી આ તપાસ તેના માટે નવી મુસીબત બનીને આવી છે.