સાગર (મધ્યપ્રદેશ), તા.17: કહેવાય છે કે સપના પૂરા કરવાની કોઈ ઉંમર હોતી નથી, અને આ વાતને સાર્થક કરી બતાવી છે મધ્યપ્રદેશના સાગર જિલ્લાની ગૃહિણી પ્રતિભા સિંહે. 36 વર્ષની ઉંમરે, જ્યારે લોકો કારકિર્દીના અંત વિશે વિચારતા હોય છે, ત્યારે બે બાળકોની માતા પ્રતિભાએ પિસ્તોલ શૂટિંગમાં પોતાની પ્રતિભાના જોરે ભારતીય ટીમ (ગ્રુપ બી) માં સ્થાન મેળવીને સૌને ચોંકાવી દીધા છે.

દીકરીની નાકામયાબી બની માતાની સફળતાનો પાયો

પ્રતિભા સિંહની આ સફર કોઈ ફિલ્મી વાર્તાથી ઓછી નથી. બાળપણથી જ શૂટિંગનો શોખ હોવા છતાં જવાબદારીઓને કારણે તેઓ આગળ વધી શક્યા નહોતા. જ્યારે તેઓ પોતાની પુત્રીને શૂટિંગ એકેડેમીમાં એડમિશન અપાવવા ગયા, ત્યારે નાની ઉંમરને કારણે દીકરીને પ્રવેશ ન મળ્યો. આ ઘટનાએ પ્રતિભાના મનમાં દબાયેલા સપનાને ફરી જીવંત કર્યું. તેમણે પતિ ડૉ. અજય સિંહ સાથે વાત કરી અને શસ્ત્ર ઉપાડીને મેદાનમાં ઉતરવાનો નિર્ણય કર્યો.

સવારે 4 વાગ્યાથી શરૂ થતો સંઘર્ષ

એક ગૃહિણી માટે રમતગમત અને પરિવાર વચ્ચે સંતુલન જાળવવું એ સૌથી મોટો પડકાર હતો. પ્રતિભા દરરોજ સવારે 4:00 વાગ્યે ઉઠે છે. પતિને હોસ્પિટલ અને બાળકોને શાળાએ મોકલ્યા બાદ, ઘરનું તમામ કામકાજ પતાવીને તેઓ 2 થી 4 કલાક શૂટિંગની પ્રેક્ટિસ કરે છે. 2022 માં જ્યારે તેમણે શરૂઆત કરી ત્યારે લોકો કહેતા હતા કે "બે બાળકો સાથે આ બધું કેવી રીતે થશે?", પરંતુ પ્રતિભાએ પોતાની મહેનતથી તમામ ટીકાકારોના મોં બંધ કરી દીધા છે.

નેશનલ ચેમ્પિયનશિપમાં શાનદાર પ્રદર્શન

દિલ્હીમાં યોજાયેલી 68મી રાષ્ટ્રીય પિસ્તોલ શૂટિંગ ચેમ્પિયનશિપમાં પ્રતિભા સિંહે અદભૂત પ્રદર્શન કર્યું હતું, જેના આધારે તેમની પસંદગી ભારતીય ટીમમાં કરવામાં આવી છે. રાજ્ય સ્તરની સ્પર્ધાઓમાં રજત અને કાંસ્ય ચંદ્રક જીતીને તેમણે સાગર જિલ્લાનું નામ રોશન કર્યું છે. તેઓ આ જિલ્લાના પ્રથમ એવા ખેલાડી છે જેમની પસંદગી રાષ્ટ્રીય ટીમમાં થઈ હોય.

લક્ષ્ય હવે આંતરરાષ્ટ્રીય ગોલ્ડ મેડલ

પ્રતિભા સિંહનું હવે એક જ સ્વપ્ન છે - આંતરરાષ્ટ્રીય સ્તરે ભારત માટે ગોલ્ડ મેડલ જીતવો. તેમના પતિ ડૉ. અજય સિંહ, જેઓ બુંદેલખંડ મેડિકલ કોલેજમાં ફરજ બજાવે છે, તેઓ જણાવે છે કે પ્રતિભાએ સાબિત કર્યું છે કે જો દ્રઢ નિશ્ચય હોય તો કોઈ પણ અવરોધ તમને રોકી શકતો નથી. પ્રતિભા અન્ય મહિલાઓ માટે પ્રેરણા સ્ત્રોત બની છે કે લગ્ન અને બાળકો પછી પણ સપનાઓ પૂરા થઈ શકે છે.