નવી દિલ્હી: કેન્દ્ર સરકાર દ્વારા નાગરિકોના રોજિંદા જીવનમાં કાયદાકીય ગૂંચવણો ઘટાડવા માટે એક મોટું કદમ ઉઠાવવામાં આવ્યું છે. બુધવારે રાજ્યસભામાં 'રદ અને સુધારા બિલ, 2025' ધ્વનિમતથી પસાર કરવામાં આવ્યું હતું. આ બિલ અગાઉ મંગળવારે લોકસભામાં મંજૂર થઈ ચૂક્યું હતું. આ નવા કાયદા હેઠળ અંગ્રેજોના સમયના અને હવે અપ્રસ્તુત થઈ ગયેલા કુલ 71 કાયદાઓને સંપૂર્ણપણે રદ કરવામાં આવ્યા છે.

ભેદભાવપૂર્ણ કાયદાઓ પર 'સર્જિકલ સ્ટ્રાઈક'

કેન્દ્રીય કાયદા મંત્રી અર્જુન રામ મેઘવાલે રાજ્યસભામાં બિલ રજૂ કરતા જણાવ્યું હતું કે, આ સુધારાનો મુખ્ય ઉદ્દેશ્ય 'ઈઝ ઓફ લિવિંગ' (જીવનની સરળતા) વધારવાનો છે. તેમણે 'ભારતીય ઉત્તરાધિકાર અધિનિયમ, 1925' નો ઉલ્લેખ કરતા કહ્યું કે, અત્યાર સુધી મદ્રાસ, બોમ્બે અને કલકત્તા જેવા શહેરોમાં હિન્દુ, બૌદ્ધ, શીખ કે જૈન વ્યક્તિએ વસિયતનામું (Will) કર્યું હોય તો તેની કોર્ટમાં ચકાસણી કરાવવી પડતી હતી, જ્યારે મુસ્લિમો માટે આવો કોઈ નિયમ નહોતો. મોદી સરકારે આ ધાર્મિક ભેદભાવને દૂર કરી વસિયતનામાની માન્યતા માટે સમાન કાયદો અમલી બનાવ્યો છે.

કયા કાયદાઓ રદ થયા?

રદ કરવામાં આવેલા 71 કાયદાઓમાં 'ભારતીય ટ્રામવેઝ એક્ટ, 1886', 'લેવી સુગર પ્રાઇસ ઇક્વલાઇઝેશન ફંડ એક્ટ, 1976' અને 'ભારત પેટ્રોલિયમ કોર્પોરેશન લિમિટેડ એક્ટ, 1988' જેવા જૂના કાયદાઓનો સમાવેશ થાય છે. આ ઉપરાંત 'ડિઝાસ્ટર મેનેજમેન્ટ એક્ટ, 2005' માં રહેલી ડ્રાફ્ટિંગની ભૂલોને પણ આ બિલ દ્વારા સુધારવામાં આવી છે.

2014 થી અત્યાર સુધીમાં 1,577 કાયદાઓ રદ

કાયદા મંત્રીએ ગર્વ સાથે જણાવ્યું કે 2014 માં વડાપ્રધાન મોદીના સત્તામાં આવ્યા બાદ અત્યાર સુધીમાં કુલ 1,577 જેટલા જૂના અને બિનઉપયોગી કાયદાઓ રદ કરવામાં આવ્યા છે. તેમણે ઉમેર્યું કે, "જો કોઈ કાયદો નાગરિકો માટે અવરોધ બને છે, તો સરકાર તેને હટાવવા માટે કટિબદ્ધ છે."

જોકે, વિપક્ષી નેતાઓએ આ બિલને માત્ર 'કાગળકામ' ગણાવી તેની જમીની અસર પર સવાલ ઉઠાવ્યા હતા. બીજી તરફ, શાસક પક્ષના નેતાઓએ તેને 'ગુલામીની માનસિકતા' માંથી મુક્તિ તરફનું વધુ એક પગલું ગણાવ્યું હતું. આ બિલના પસાર થવાથી કાનૂની પ્રક્રિયાઓમાં પારદર્શિતા આવશે અને સામાન્ય માણસની કોર્ટ-કચેરીની અટપટી વિધિઓમાં ઘટાડો થશે તેવી આશા સેવવામાં આવી રહી છે.