વોશિંગ્ટન, તા. ૧૮ : અમેરિકાના રાષ્ટ્રપતિ ડોનાલ્ડ ટ્રમ્પ હંમેશા તેમના આક્રમક અંદાજ અને આશ્ચર્યજનક નિર્ણયો માટે જાણીતા છે, પરંતુ આ વખતે તેમણે વ્હાઇટ હાઉસની અંદર જ પોતાના પુરોગામીઓ પર એવો ‘હુમલો’ કર્યો છે જેની વિશ્વભરમાં ચર્ચા થઈ રહી છે. ટ્રમ્પે વ્હાઇટ હાઉસના પ્રતિષ્ઠિત "પ્રેસિડેન્શિયલ વોક ઓફ ફેમ" માં ફેરફાર કરીને પૂર્વ રાષ્ટ્રપતિઓના પોટ્રેટ નીચે એવી તકતીઓ લગાવી છે જે તેમના શાસનની કડવી ટીકા કરે છે.

જો બિડેન: પોટ્રેટ પણ છીનવી લીધું

સૌથી વધુ અપમાનજનક સ્થિતિ જો બિડેનની જોવા મળી છે. ૧૭ ડિસેમ્બરના રોજ સામે આવેલી તસવીરો મુજબ, તમામ પૂર્વ રાષ્ટ્રપતિઓના ફોટા છે, પરંતુ બિડેનની જગ્યાએ માત્ર એક ‘ઓટોપેન’ (સહી કરવાનું મશીન) નો ફોટો મૂકવામાં આવ્યો છે. તેની નીચે લખેલી તકતીમાં તેમને "અમેરિકાના ઇતિહાસના સૌથી ખરાબ અને ભ્રષ્ટ ચૂંટણી જીતનાર રાષ્ટ્રપતિ" તરીકે ઓળખાવવામાં આવ્યા છે. ટ્રમ્પનો આક્ષેપ છે કે બિડેન વતી નિર્ણયો મશીનો અને અન્ય લોકો જ લેતા હતા.

ઓબામા અને ક્લિન્ટન પર પણ નિશાન

ટ્રમ્પના નિશાના પર માત્ર બિડેન જ નહીં, પણ બરાક ઓબામા અને બિલ ક્લિન્ટન પણ છે. ઓબામાની તકતી પર તેમને "અમેરિકાના ઇતિહાસના સૌથી વિભાજનકારી નેતા" ગણાવ્યા છે. જ્યારે બિલ ક્લિન્ટનના ફોટા નીચે લખ્યું છે કે, "૨૦૧૬ માં, રાષ્ટ્રપતિ ક્લિન્ટનની પત્ની હિલેરી ક્લિન્ટન, ડોનાલ્ડ ટ્રમ્પ સામે ચૂંટણી હારી ગયા હતા!" આમ, ટ્રમ્પે ક્લિન્ટનના પોતાના કાર્યકાળને બદલે તેમની પત્નીની હારનો ઉલ્લેખ કરીને તેમને ટ્રોલ કર્યા છે.

રિપબ્લિકન નેતા બુશ પણ ન બચ્યા

ટ્રમ્પનો આ કટાક્ષ માત્ર ડેમોક્રેટ્સ પૂરતો મર્યાદિત નથી. પોતાની જ પાર્ટીના પૂર્વ રાષ્ટ્રપતિ જ્યોર્જ ડબલ્યુ. બુશ પર પણ તેમણે નિશાન સાધ્યું છે. બુશની તકતી પર અફઘાનિસ્તાન અને ઈરાક યુદ્ધો માટે તેમને જવાબદાર ઠેરવવામાં આવ્યા છે અને લખ્યું છે કે "આ યુદ્ધો ક્યારેય થવા જોઈતા નહોતા."

ઇતિહાસ કે બદલો?

વ્હાઇટ હાઉસના પ્રેસ સેક્રેટરી કેરોલિન લીવિટે આ પગલાનો બચાવ કરતા કહ્યું છે કે આ તકતીઓ દરેક નેતાના વારસાનું "સચોટ વર્ણન" છે. જોકે, રાજકીય વિશ્લેષકો તેને વ્હાઇટ હાઉસની ગરિમા અને રાષ્ટ્રીય એકતાના પ્રતીક પરના પ્રહાર તરીકે જોઈ રહ્યા છે. સામાન્ય રીતે વ્હાઇટ હાઉસને પક્ષપાતથી ઉપર રાખવામાં આવે છે, પરંતુ ટ્રમ્પના આ પગલાએ અમેરિકી રાજકારણમાં નવો ખળભળાટ મચાવ્યો છે.