કોચી : કોચીન ઇન્ટરનેશનલ એરપોર્ટ (CIAL) આજે સવારે એક મોટી દુર્ઘટનાનું સાક્ષી બનતા રહી ગયું. જેદ્દાહથી ૧૬૦ મુસાફરો અને ક્રૂ મેમ્બર્સને લઈને કોઝીકોડ જઈ રહેલી એર ઈન્ડિયા એક્સપ્રેસની ફ્લાઈટ IX 398માં ટાયર ફાટવાની ગંભીર ટેકનિકલ ખામી સર્જાતા તેને તાત્કાલિક કોચી ડાયવર્ટ કરવામાં આવી હતી. એરપોર્ટ પર "ફુલ ઈમરજન્સી" જાહેર કરવામાં આવતા મુસાફરોના જીવ જોખમમાં મુકાયા હતા, પરંતુ પાયલોટની સતર્કતાથી વિમાન સુરક્ષિત રીતે નીચે ઉતારવામાં સફળતા મળી છે.

એરપોર્ટ છાવણીમાં ફેરવાયું: કટોકટી પ્રતિભાવ યોજના સક્રિય

સવારે ૮.૩૫ વાગ્યે જ્યારે લેન્ડિંગની માહિતી મળી, ત્યારે એરપોર્ટ પ્રશાસને સેકન્ડોમાં જ 'ઇમરજન્સી રિસ્પોન્સ પ્લાન' અમલમાં મૂક્યો હતો. રનવેની આસપાસ એરપોર્ટ ફાયર એન્ડ રેસ્ક્યુ સર્વિસ, મેડિકલ ટીમો અને રાજ્ય પોલીસનો કાફલો ગોઠવી દેવામાં આવ્યો હતો. વિમાનમાં કોઈ મોટી હોનારત ન સર્જાય તે માટે હાઈ એલર્ટ જારી કરવામાં આવ્યું હતું.

લેન્ડિંગ ગિયરના બંને ટાયર ફાટેલા મળ્યા

સવારે ૯.૦૮ વાગ્યે ભારે તણાવ વચ્ચે વિમાન રનવે પર સ્પર્શ્યું હતું. લેન્ડિંગ પછી જ્યારે ટેકનિકલ ટીમે તપાસ કરી ત્યારે ચોંકાવનારી વિગત સામે આવી હતી કે વિમાનના જમણી બાજુના લેન્ડિંગ ગિયરના બંને ટાયર ફાટી ગયા હતા. સદનસીબે, ૧૬૦ મુસાફરો કે ક્રૂમાંથી કોઈને પણ ઈજા પહોંચી નથી. સુરક્ષિત લેન્ડિંગ બાદ મુસાફરોએ રાહતનો શ્વાસ લીધો હતો.

વિમાની સેવાઓ પર અસર

આ કટોકટીને કારણે કોચી એરપોર્ટ પરની અન્ય ફ્લાઈટ્સ પર પણ અસર પડી હતી. રનવે સાફ કરવા માટે સવારે ૯.૪૫ સુધી કામગીરી ચાલી હતી, જેના કારણે ૬ આવનારી ફ્લાઈટ્સ મોડી પડી હતી અને કેટલીક ફ્લાઈટ્સને અન્ય એરપોર્ટ પર વાળવામાં આવી હતી. જોકે, સવારે ૧૦ વાગ્યા સુધીમાં એરપોર્ટની કામગીરી ફરીથી સામાન્ય થઈ ગઈ હતી.

એર ઈન્ડિયા એક્સપ્રેસ દ્વારા હવે આ યાંત્રિક નિષ્ફળતા પાછળના કારણોની ઊંડી તપાસ કરવામાં આવી રહી છે.