કિન્ડુ: ડેમોક્રેટિક રિપબ્લિક ઓફ કોંગો (DRC) ના કિન્ડુ એરપોર્ટ પર ઉડ્ડયન ઇતિહાસની એક અત્યંત શરમજનક અને જોખમી ઘટના બની છે. એર કોંગોની ફ્લાઇટ સુરક્ષિત રીતે લેન્ડ થયા બાદ મુસાફરો પોતાના ઘરે જવા માટે ઉત્સુક હતા, પરંતુ એરપોર્ટ સત્તાવાળાઓ અને એરલાઇન્સ કલાકો સુધી મુસાફરોને નીચે ઉતારવા માટે મોબાઇલ સીડી પૂરી પાડવામાં નિષ્ફળ રહી હતી. રાત્રિના અંધકારમાં બનેલી આ ઘટનાએ મુસાફરોના જીવ જોખમમાં મૂક્યા હતા.
6 ફૂટ નીચે ડામર પર જીવલેણ છલાંગ
કલાકો સુધી ગૂંગળામણભરી સ્થિતિમાં વિમાનની અંદર બેસી રહ્યા બાદ મુસાફરોની ધીરજ ખૂટી ગઈ હતી. સોશિયલ મીડિયા પર વાયરલ થયેલા એક વીડિયોમાં જોઈ શકાય છે કે, વિમાનનો મુખ્ય દરવાજો ખુલ્લો છે અને મુસાફરો એકબીજાની મદદથી દરવાજા પરથી લગભગ 5-6 ફૂટ નીચે રનવેના ડામર પર કૂદકા મારી રહ્યા છે. આ દ્રશ્યોએ મુસાફરોની સુરક્ષા સામે ગંભીર સવાલો ઉભા કર્યા છે, ખાસ કરીને વૃદ્ધો અને શારીરિક તકલીફ ધરાવતા લોકો માટે આ અત્યંત જોખમી સાબિત થઈ શક્યું હોત.
ખખડધજ ઇન્ફ્રાસ્ટ્રક્ચરની વરવી વાસ્તવિકતા
કિન્ડુ એરપોર્ટ પૂર્વીય ડીઆરસીનું મુખ્ય કેન્દ્ર હોવા છતાં અહીં પાયાની સુવિધાઓનો અભાવ છે. આ ઘટનાએ સાબિત કરી દીધું છે કે અહીં ગ્રાઉન્ડ હેન્ડલિંગ અને સાધનોની જાળવણીમાં કેટલી મોટી ખામી છે. એર કોંગો જેવી નવી રાષ્ટ્રીય એરલાઇન્સ જ્યારે ઇથોપિયન એરલાઇન્સ સાથે ભાગીદારીમાં શરૂ કરવામાં આવી છે, ત્યારે આવી 'પેસેન્જર એક્સપિરિયન્સ' (PaxEx) નિષ્ફળતા આંતરરાષ્ટ્રીય સ્તરે દેશની છબી ખરાબ કરી રહી છે.
2025 માં ઉડ્ડયન સલામતીનો મોટો પ્રશ્ન
વર્ષ 2025 માં જ્યારે દુનિયા હાઇ-ટેક મુસાફરીની વાતો કરે છે, ત્યારે કોંગોમાં મુસાફરોને વિમાનમાંથી કૂદીને નીચે ઉતરવું પડે તે દુર્ભાગ્યપૂર્ણ છે. જોકે આ કોઈ ક્રેશ નહોતું, પરંતુ ગ્રાઉન્ડ ઓપરેશનની આ ગંભીર ખામી કોઈ મોટા અકસ્માતને આમંત્રણ આપી શકતી હતી. આંતરરાષ્ટ્રીય સ્તરે ઉડ્ડયન નિષ્ણાતો આ ઘટનાને એરપોર્ટ મેનેજમેન્ટની ઘોર બેદરકારી ગણાવી રહ્યા છે.