ટોક્યો : આર્ટિફિશિયલ ઇન્ટેલિજન્સ (AI) ની દુનિયામાં અત્યારે એક જ નામનો ડંકો વાગી રહ્યો છે અને તે છે 'ઓપનએઆઈ' (OpenAI). પરંતુ આ સફળતા પાછળ જે નાણાકીય શક્તિ જોઈએ છે, તેના માટે જાપાની અબજોપતિ માસાયોશી સન અને તેમની કંપની સોફ્ટબેંક એડીચોટીનું જોર લગાવી રહી છે. વર્ષના અંત સુધીમાં ઓપનએઆઈને $22.5 બિલિયન (અંદાજે 1.8 લાખ કરોડ રૂપિયાથી વધુ) નું જંગી ભંડોળ પૂરું પાડવાના વચનને પૂર્ણ કરવા માટે સોફ્ટબેંક અત્યારે "મિશન મોડ" માં કામ કરી રહી છે.
પૈસા ભેગા કરવા માસાયોશી સનનું 'ઓલ-ઈન' અભિયાન
AI ક્રાંતિમાં પોતાનું વર્ચસ્વ જાળવી રાખવા માટે માસાયોશી સને પોતાની શ્રેષ્ઠ મિલકતો દાવ પર લગાવી દીધી છે. સૂત્રોના જણાવ્યા અનુસાર, સોફ્ટબેંકે ચિપ માર્કેટની દિગ્ગજ કંપની એનવીડિયા (Nvidia) માં પોતાનો સંપૂર્ણ $5.8 બિલિયનનો હિસ્સો વેચી દીધો છે. એટલું જ નહીં, અમેરિકન ટેલિકોમ કંપની ટી-મોબાઈલ (T-Mobile) માંથી પણ $4.8 બિલિયન રોકડા કર્યા છે. સનનો આ "ઓલ-ઈન" દાવ દર્શાવે છે કે તેઓ માને છે કે ભવિષ્ય માત્ર અને માત્ર AI ના હાથમાં છે.
કેમ ઓપનએઆઈને આટલા બધા પૈસાની જરૂર છે?
ઓપનએઆઈના સીઈઓ સેમ ઓલ્ટમેન હવે ગૂગલના 'જેમિની' (Gemini) સામે સીધી સ્પર્ધામાં છે. ચેટજીપીટી (ChatGPT) ને વધુ સ્માર્ટ બનાવવા અને વિશાળ ડેટા સેન્ટર ઊભા કરવા માટે અબજો ડોલરના રોકાણની જરૂર છે. ઓલ્ટમેનનું લક્ષ્ય દર અઠવાડિયે ૧ ગીગાવોટ કમ્પ્યુટિંગ ક્ષમતા ઉમેરવાનું છે, જે અત્યંત ખર્ચાળ પ્રક્રિયા છે. આ માટે સોફ્ટબેંકનું ભંડોળ ઓપનએઆઈ માટે પ્રાણવાયુ સમાન સાબિત થશે.
આર્મ હોલ્ડિંગ્સ અને પેપે આઈપીઓ પર નજર
સોફ્ટબેંક પાસે હજુ પણ કેટલાક હથિયારો બાકી છે. કંપની તેની ચિપ ડિઝાઈન ફર્મ 'આર્મ' (Arm) ના શેર ગીરો મૂકીને લોન લેવાની તૈયારીમાં છે, કારણ કે આર્મનો સ્ટોક લિસ્ટિંગ પછી ત્રણ ગણો વધી ગયો છે. બીજી તરફ, યુએસ સરકારના શટડાઉનને કારણે સોફ્ટબેંકની પેમેન્ટ્સ એપ 'પેપે' (PayPay) નો $20 બિલિયનનો આઈપીઓ (IPO) થોડો મોડો પડ્યો છે, જે હવે ૨૦૨૬ ના પ્રથમ ક્વાર્ટરમાં આવવાની શક્યતા છે. આ મસમોટા વ્યવહારો સાબિત કરે છે કે અંતરિક્ષથી લઈને પૃથ્વી સુધી, ટેકનોલોજીના સામ્રાજ્ય પર કબજો કરવા માટે સોફ્ટબેંક કોઈ પણ જોખમ લેવા તૈયાર છે.