મદુરાઈ, તા.૨૦ : ન્યાયતંત્રમાં માનવીય મૂલ્યો અને ધાર્મિક ગ્રંથોના ઉમદા સંદેશાઓનો સંગમ કરાવતો એક અદભૂત ચુકાદો મદ્રાસ હાઈકોર્ટની મદુરાઈ બેન્ચે આપ્યો છે. કામ પૂર્ણ થયા પછી તુરંત અને વાજબી ચુકવણી અંગે પયગંબર મોહમ્મદ (સ.અ.વ.) ના પ્રખ્યાત સૂત્રને ટાંકીને ન્યાયાધીશ જી.આર. સ્વામીનાથને મદુરાઈ કોર્પોરેશનને તેના ભૂતપૂર્વ વકીલની લાંબા સમયથી બાકી રહેલી ફી વ્યાજ વગર ચૂકવી દેવા આદેશ આપ્યો છે.

પયગંબર સાહેબનો સંદર્ભ અને ન્યાયની ગરિમા

રિટ અરજદાર પી. થિરુમલાઈ ૧૯૯૨ થી ૨૦૦૬ સુધી મદુરાઈ કોર્પોરેશનમાં વકીલ તરીકે સેવા આપી હતી. ૮૧૮ જેટલા કેસો લડવા છતાં કોર્પોરેશને તેમની ૧૩.૦૫ લાખ રૂપિયાની ફી ચૂકવી નહોતી. આ મામલે ચુકાદો આપતા જજ સ્વામીનાથને કહ્યું કે, "કામદારનો પરસેવો સુકાય તે પહેલાં તેને ચૂકવણી કરો - આ પવિત્ર પયગંબરની સૂચના છે. આ સિદ્ધાંત માત્ર ન્યાયનું એક પાસું નથી પરંતુ શ્રમ ન્યાયશાસ્ત્રનો આત્મા છે." તેમણે નોંધ્યું હતું કે અરજદાર વકીલ હાલમાં અત્યંત ગરીબ પરિસ્થિતિમાં જીવી રહ્યા છે.

મોટી ફી વસૂલતા વકીલો પર પ્રહાર

ચુકાદા દરમિયાન ન્યાયાધીશે વકીલાતના વ્યવસાયમાં વ્યાપેલા વ્યાપારીકરણ પર પણ આકરા પ્રહાર કર્યા હતા. તેમણે નિંદા કરતા જણાવ્યું કે, કેટલાક વરિષ્ઠ વકીલો કોર્ટમાં માત્ર એક વાર હાજર રહેવા માટે ૪ લાખ રૂપિયા જેવી મોટી રકમ વસૂલે છે. સરકારી સંસ્થાઓ અને યુનિવર્સિટીઓ એક તરફ નિવૃત્ત સ્ટાફના લેણાં ચૂકવવા માટે નાણાં નથી તેમ કહે છે અને બીજી તરફ વકીલોને લાખો રૂપિયાની ફી ચૂકવે છે. જજે સૂચન કર્યું કે હવે કાયદા અધિકારીઓને અપાતી ફીનું ઓડિટ કરવાનો સમય પાકી ગયો છે.

બે મહિનામાં ચુકવણીનો આદેશ

હાઈકોર્ટે મદુરાઈ જિલ્લા કાનૂની સેવા સત્તામંડળને નિર્દેશ આપ્યો છે કે તેઓ બે મહિનામાં તમામ કેસોની યાદી અને દસ્તાવેજો ચકાસીને અરજદારને પૂરા પાડે. આ પ્રક્રિયા પૂર્ણ થયા બાદ કોર્પોરેશને કોઈપણ પ્રકારના વ્યાજ વગર બાકી રહેલી તમામ રકમ બે મહિનાની અંદર વકીલને ચૂકવી દેવાની રહેશે. હાઈકોર્ટના આ સંવેદનશીલ અભિગમની કાયદાકીય વર્તુળોમાં ભારે પ્રશંસા થઈ રહી છે.