મુંબઈ, ૨૧ ડિસેમ્બર ૨૦૨૫ : ભારતીય શેરબજારમાં વર્ષ ૨૦૨૫માં જોવા મળેલી આઈપીઓ (IPO) ની સુનામી બાદ હવે વર્ષ ૨૦૨૬ વધુ ભવ્ય રહેવાની આશા છે. પ્રાઈમ ડેટાબેઝના તાજા અહેવાલ મુજબ, માર્કેટ રેગ્યુલેટર સેબી (SEBI) એ અત્યાર સુધીમાં ૮૪ કંપનીઓને મંજૂરી આપી દીધી છે જેઓ અંદાજે ૧.૧૪ લાખ કરોડ રૂપિયા એકત્રિત કરવાનું લક્ષ્ય ધરાવે છે. આ સિવાય અન્ય ૧૦૮ કંપનીઓ ૧.૪૬ લાખ કરોડ રૂપિયાના આયોજન સાથે મંજૂરીની રાહ જોઈ રહી છે. આમ, કુલ ૨.૫ લાખ કરોડ રૂપિયાથી વધુનું ફંડ બજારમાંથી ઉઘરાવવાની તૈયારીઓ ચાલી રહી છે.

વર્ષ ૨૦૨૬ના ૧૦ સૌથી વધુ પ્રતિક્ષિત IPO

૧. રિલાયન્સ જિયો: ભારતીય બજારના ઇતિહાસનો આ સૌથી મોટો આઈપીઓ હોઈ શકે છે. ૧૭૦ અબજ ડોલરના વેલ્યુએશન સાથે મુકેશ અંબાણીએ સંકેત આપ્યો છે કે ૨૦૨૬ના પ્રથમ છ મહિનામાં આ લિસ્ટિંગ થઈ શકે છે.

૨. NSE (નેશનલ સ્ટોક એક્સચેન્જ): રોકાણકારોમાં સૌથી વધુ ઉત્સાહ આ આઈપીઓ માટે છે. સેબીના અધિકારીઓના જણાવ્યા મુજબ લાંબા સમયથી અટવાયેલો આ ઈશ્યૂ ટૂંક સમયમાં વાસ્તવિકતા બનશે. હાલ અનલિસ્ટેડ માર્કેટમાં તેના શેર ૧,૯૫૦ રૂપિયાની આસપાસ ટ્રેડ થઈ રહ્યા છે.

૩. ફ્લિપકાર્ટ: નેશનલ કંપની લો ટ્રિબ્યુનલે તાજેતરમાં ફ્લિપકાર્ટની આઠ એન્ટિટીના મર્જરને મંજૂરી આપી છે, જે તેના ભારતમાં લિસ્ટિંગ માટેનો રસ્તો સાફ કરે છે.

૪. ફોનપે (PhonePe): આ ડિજિટલ પેમેન્ટ પ્લેટફોર્મે ૧.૫ અબજ ડોલર (અંદાજે ૧૨,૦૦૦ કરોડ રૂપિયા) ઉઘરાવવા માટે સેબી પાસે ડ્રાફ્ટ પેપર્સ ફાઇલ કર્યા હોવાના અહેવાલ છે.

૫. ઝેપ્ટો (Zepto): ક્વિક-કોમર્સ પ્લેટફોર્મ ઝેપ્ટો ૫૦૦ મિલિયન ડોલરના આઈપીઓ સાથે મુંબઈમાં આગામી સપ્તાહે પેપર્સ ફાઇલ કરી શકે છે.

૬. ઓયો (Oyo): ઓયો ૭ થી ૮ અબજ ડોલરના વેલ્યુએશનના ટાર્ગેટ સાથે નવેમ્બરમાં ડ્રાફ્ટ પેપર્સ સબમિટ કરવાનું આયોજન કરી રહ્યું છે.

૭. બોટ (boAt): તેની પેરેન્ટ કંપની ઇમેજિન માર્કેટિંગ સર્વિસને ૧,૫૦૦ કરોડ રૂપિયાના આઈપીઓ માટે સત્તાવાર મંજૂરી મળી ગઈ છે.

૮. કારદેખો (CarDekho): ગિરનાર સોફ્ટવેર સંચાલિત આ કંપનીએ અગાઉના પ્લાન હાલ પૂરતા મોકૂફ રાખ્યા છે પરંતુ ૨૦૨૬માં ફરી મેદાનમાં આવી શકે છે.

૯. હીરો ફિનકોર્પ: આ કંપની ૨,૧૦૦ કરોડના નવા શેર અને ૧,૫૬૮ કરોડના ઓફર ફોર સેલ (OFS) સાથે ફાઇનાન્શિયલ સર્વિસ સેક્ટરમાં ધમાકો કરવા તૈયાર છે.

૧૦. SBI મ્યુચ્યુઅલ ફંડ: એસબીઆઈના ચેરમેન સી.એસ. શેટ્ટીના જણાવ્યા મુજબ, ૧૨ મહિનાના સમયગાળામાં લિસ્ટિંગ માટે મર્ચન્ટ બેન્કર્સની નિમણૂકની પ્રક્રિયા શરૂ કરી દેવામાં આવી છે.

નિષ્ણાતોનો મત

પ્રાઈમ સિક્યોરિટીઝના ડિરેક્ટર અક્ષય ગુપ્તાના જણાવ્યા અનુસાર, ૨૦૨૬નું વર્ષ બજારની પરિપક્વતાની કસોટી કરશે. ન્યૂ-એજ ટેકનોલોજીથી લઈને સ્થાપિત લેગસી પ્લેયર્સ સુધીની કંપનીઓ જે રીતે મૂડી ઉભી કરશે, તેનાથી ભારતીય પ્રાયમરી માર્કેટ વૈશ્વિક સ્તરે વધુ સ્પર્ધાત્મક બનશે.

ડિસ્કલેમર: આ સમાચાર માત્ર શૈક્ષણિક હેતુ અને માહિતી માટે છે. શેરબજારમાં રોકાણ અને IPOમાં નાણાં રોકવા બજારના જોખમોને આધીન છે. કોઈપણ રોકાણ કરતા પહેલા તમારા નાણાકીય સલાહકારની સલાહ લેવી અનિવાર્ય છે.