દિબ્રુગઢ: વડાપ્રધાન નરેન્દ્ર મોદીએ રવિવારે આસામના દિબ્રુગઢમાં પૂર્વોત્તરના વિકાસનો એક નવો અધ્યાય લખતા રૂ.10,601 કરોડના અત્યાધુનિક ખાતર પ્લાન્ટનો શિલાન્યાસ કર્યો. એક વિશાળ જનમેદનીને સંબોધતા તેમણે કોંગ્રેસના શાસનકાળની યાદ અપાવતા કહ્યું કે, અગાઉની સરકારોમાં ખેડૂતોને માત્ર એક થેલી ખાતર માટે કલાકો સુધી લાંબી કતારોમાં ઉભા રહેવું પડતું હતું અને ઘણીવાર પોલીસના લાઠીચાર્જનો ભોગ બનવું પડતું હતું. પીએમ મોદીએ ગર્જના કરી કે જે ખાતરના કારખાનાઓ કોંગ્રેસે બંધ કર્યા હતા, તેને ભાજપ સરકાર ફરી શરૂ કરીને દેશને ખેતી ક્ષેત્રે 'આત્મનિર્ભર' બનાવી રહી છે. આ નવો પ્લાન્ટ વાર્ષિક 1.2 મિલિયન મેટ્રિક ટન ખાતરનું ઉત્પાદન કરી ખેડૂતોના ખર્ચમાં મોટો ઘટાડો કરશે.
રાજકીય પ્રહારો તેજ કરતા વડાપ્રધાને આસામની અસ્મિતાનો મુદ્દો છેડ્યો અને કોંગ્રેસ પર રાષ્ટ્રવિરોધી વિચારસરણીને પ્રોત્સાહન આપવાનો ગંભીર આરોપ લગાવ્યો. તેમણે કહ્યું કે કોંગ્રેસ આજે પણ બાંગ્લાદેશી ઘૂસણખોરોને આસામના જંગલો અને જમીનોમાં વસાવવા માટે મથામણ કરી રહી છે, જેથી તેમની વોટબેંક મજબૂત રહે. પીએમ મોદીએ સવાલ કર્યો કે કોંગ્રેસ શા માટે મતદાર યાદીના શુદ્ધિકરણનો વિરોધ કરી રહી છે? તેમણે આસામની જનતાને ખાતરી આપી કે ભાજપ સરકાર રાજ્યની ઓળખ અને ગૌરવની રક્ષા કરવા માટે કોઈ પણ હદે જશે અને તુષ્ટિકરણના ઝેરને આસામની પવિત્ર ધરતી પર ફેલાવા નહીં દે.
વિકાસના આંકડા રજૂ કરતા પીએમ મોદીએ જણાવ્યું કે છેલ્લા 11 વર્ષમાં 'બીજથી બજાર' સુધીના વિઝન સાથે સરકારે કામ કર્યું છે. પીએમ કિસાન સન્માન નિધિ દ્વારા રૂ.4 લાખ કરોડ સીધા ખેડૂતોના ખાતામાં પહોંચાડવામાં આવ્યા છે, જેથી તેમને શાહુકારો પાસે લોન માટે હાથ ફેલાવવા ન પડે. તેમણે ઉમેર્યું કે 'સબકા સાથ, સબકા વિકાસ' મંત્રને કારણે દેશના 25 કરોડ લોકો ગરીબીની રેખામાંથી બહાર આવ્યા છે અને આજે દેશમાં એક શક્તિશાળી મધ્યમ વર્ગ ઉભરી રહ્યો છે. આસામમાં ગુવાહાટી એરપોર્ટના નવા ટર્મિનલથી લઈને આધુનિક ફેક્ટરીઓ સુધીનો પ્રવાસ માત્ર શરૂઆત છે, હજુ ઘણું કરવાનું બાકી છે.
આસામ અને પૂર્વોત્તર માટેના આ ઐતિહાસિક દિવસને પીએમ મોદીએ એક નવી આશાનું કિરણ ગણાવ્યું. તેમણે દિબ્રુગઢ અને નામરૂપના લાંબા સમયથી લટકતા પ્રોજેક્ટ્સને સાકાર કરવાની પ્રતિબદ્ધતા દોહરાવી હતી. વડાપ્રધાને સ્પષ્ટ કર્યું કે તેમની સરકાર માત્ર શિલાન્યાસ જ નથી કરતી, પણ નિર્ધારિત સમયમાં તેનું ઉદ્ઘાટન પણ કરે છે. ખેડૂતો માટે શરૂ કરાયેલ પીએમ ધન ધન્ય કૃષિ યોજના અને કઠોળ મિશન આસામના કૃષિ ક્ષેત્રમાં ક્રાંતિ લાવશે અને પૂર્વોત્તર ભારતને દેશના વિકાસનું એન્જિન બનાવશે તેવો વિશ્વાસ તેમણે વ્યક્ત કર્યો હતો.