શ્રીનગર : કાશ્મીર ખીણમાં રવિવારથી શિયાળાના સૌથી કઠોર ગણાતા ૪૦ દિવસના સમયગાળા 'ચિલ્લાઈ કલાન'નો પ્રારંભ થયો છે. આ વર્ષે પ્રકૃતિએ પણ જાણે આ સમયગાળાને વધાવ્યો હોય તેમ, રવિવારે કાશ્મીરના ઉંચાઈવાળા વિસ્તારોમાં ભારે હિમવર્ષા અને મેદાની વિસ્તારોમાં વરસાદ પડ્યો છે. લાંબા સમયથી ચાલી રહેલા કોરા સ્પેલ (સૂકા હવામાન) બાદ પડેલા આ વરસાદ અને બરફે ખીણના રહેવાસીઓને મોટી રાહત આપી છે.
પર્યટન સ્થળો પર બરફની ચાદર
સત્તાવાર માહિતી મુજબ, ઉત્તર કાશ્મીરના બારામુલ્લા જિલ્લામાં આવેલ પ્રખ્યાત પર્યટન સ્થળ ગુલમર્ગમાં અંદાજે બે ઇંચ જેટલો બરફ જમા થયો છે. તેવી જ રીતે, શ્રીનગર-કારગિલ હાઈવે પર સ્થિત સોનમર્ગમાં પણ રવિવાર વહેલી સવારથી હિમવર્ષા શરૂ થઈ હતી, જે દિવસભર ચાલુ રહી હતી. કુપવાડા જિલ્લામાં ભારત-પાક સરહદ (LoC) ને જોડતા સાધના ટોપ પાસ પર શનિવાર રાતથી અત્યાર સુધીમાં અંદાજે છ ઇંચ જેટલી મધ્યમ હિમવર્ષા નોંધાઈ છે.
શ્રીનગરમાં વરસાદ અને સ્વાસ્થ્યમાં રાહત
ખીણના મુખ્ય શહેર શ્રીનગર સહિત અન્ય મેદાની વિસ્તારોમાં પણ રાતભર હળવો વરસાદ ચાલુ રહ્યો હતો. કાશ્મીરમાં છેલ્લા ઘણા સમયથી ચાલી રહેલી શુષ્ક ઠંડીને કારણે સામાન્ય બીમારીઓ જેવી કે ખાંસી અને શરદીનું પ્રમાણ વધી ગયું હતું, ખાસ કરીને બાળકો અને વૃદ્ધોમાં આ તકલીફ વધુ જોવા મળી રહી હતી. આ વરસાદી ઝાપટાં અને હિમવર્ષાને કારણે હવામાં રહેલો સૂકાપણો દૂર થતાં લોકોએ આરોગ્યની દ્રષ્ટિએ પણ રાહત અનુભવી છે.
શુકનવંતું આગમન
સ્થાનિક માન્યતા મુજબ, ‘ચિલ્લાઈ કલાન’ના પ્રથમ દિવસે જ વરસાદ કે હિમવર્ષા થવી એ ખૂબ જ સારો સંકેત માનવામાં આવે છે. કાશ્મીરીઓ તેને આવનારા વર્ષ માટે પુષ્કળ બરફ અને પાણીની ઉપલબ્ધતાના ‘શુકન’ તરીકે જુએ છે. હવામાન વિભાગે આગાહી કરી છે કે આગામી ૪૮ કલાક દરમિયાન ખીણમાં હિમવર્ષા અને વરસાદની તીવ્રતામાં વધુ વધારો થઈ શકે છે.